Ўзбекистон республикаси адлия вазирлиги

Sud hal qiluv qarorini chiqarish va uni e’lon qilish qismi sud majlisining yakunlovchi qismi hisoblanadi. Mazkur qismda ishni mazmunan ko‘rishning yakuni sudning hal qiluv qarori tarzida rasmiylashtiriladi va e’lon qilinadi.
Sud muzokaralarini eshitgach, sud hal qiluv qarori chiqarish uchun alohida xonaga (maslahatxonaga) chiqadi, bu haqda raislik qiluvchi sud majlisida hozir bo‘lganlarga e’lon qiladi.
Hal qiluv qarori sudya tomonidan alohida xonada (maslahat-xonada) qabul qilinadi, yozma ravishda tuziladi va sudya tomonidan imzolanadi. Sudyalarning mustaqilligi va ularning faqat qonunga bo‘ysunishiga doir konstitutsiyaviy prinsipning eng muhim kafolatlaridan biri hal qiluv qarori, ajrim, qaror chiqarishda sud maslahatining sir saqlanishidir. Muhokama xonasida faqat ishda ishtirok etgan sudyalargina bo‘lishi talab etiladi. Hal qiluv qarorini qabul qilish vaqtida boshqa shaxslarning hozir bo‘lishiga yo‘l qo‘yilmaydi. Agar hal qiluv qarori, ajrim, qaror chiqarishda sud maslahatining sir saqlanishiga doir qoidalar buzilgan bo‘lsa, ushbu holat protsessual huquq normalarining buzilishi, deb baholanadi va hal qiluv qarori, ajrim yoki qarorning bekor qilinishiga asos bo‘ladi (FPKning 377-moddasi 5-bandi).