Ўзбекистон республикаси адлия вазирлиги

Sudda ish yuritishni to‘xtatib turish muddatlari FPKning 118-moddasi bilan tartibga solinadi. Unga ko‘ra, ish yuritish quyidagi vaqtga qadar to‘xtatib turiladi:
1) FPK 116-moddasining 1 va 2-bandlarida nazarda tutilgan hollarda – huquqiy voris ishga kirishguniga yoki ishga jalb qilinguniga qadar yoxud muomalaga layoqatsiz shaxsga qonuniy vakil tayinlanguniga qadar;
2) FPK 116-moddasining 3-bandida nazarda tutilgan hollarda – tarafning O‘zbekistan Respublikasi Qurolli Kuchlari-ning harakatdagi qismida bo‘lishi tugaguniga qadar;
3) FPK 116-moddasining 4-bandida nazarda tutilgan hollarda – sudning hal qiluv qarori yoki hukmi qonuniy kuchga kirguniga qadar yoki ma’muriy tartibda ko‘rilayotgan ish bo‘yicha qaror chiqarilguniga yohud tergov tamom bo‘lguniga qadar;
4) FPK 116-moddasining 5-bandida nazarda tutilgan hollarda – chet davlat sudining yoki hakamlik sudining (arbitraji-ning) hal qiluv qarorini bekor qilish to‘g‘risidagi yoxud uning ijrosini to‘xtatib turish haqidagi iltimosnoma chet davlatning vakolatli organi tomonidan hal qilinguniga qadar;
5) FPK 117-moddasining 1-bandida nazarda tutilgan hollarda – tegishincha tarafning O‘zbekiston Respublikasi Qurolli Kuchlari tarkibida muddatli haqiqiy harbiy xizmatda bo‘lishi tugaguniga yoki mazkur shaxslar davlat majburiyatini bajarib bo‘lguniga qadar;
6) FPK 117-moddasining 2-bandida nazardatutilgan hollarda – taraf davolash muassasasidan chiqquniga yoki tarafning sudga kelishiga to‘sqinlik qilayotgan kasallik tuzalguniga qadar;
7) FPK 117-moddasining 3-bandida nazarda tutilgan hollarda – javobgarni qidirish tugallanguniga qadar;
8) FPK 17-moddasining 4-bandida nazarda tutilgan hollarda – taraf qaytguniga qadar;
9) FPK 117-moddasining 5-bandida nazarda tutilgan hollarda – ekspertiza o‘tkazish bo‘yicha harakatlar tugaguniga qadar;
10) FPK 117-moddasining 6-bandida nazarda tutilgan hollarda – sud topshirig‘ini ijro etish bo‘yicha harakatlar tugaguniga qadar to‘xtatib turiladi.
Sudning ish yuritishni to‘xtatib turish to‘g‘risidagi ajrimi ustidan xususiy shikoyat qilinishi yoki xususiy protest keltirilishi mumkin.
Ish yuritish uni to‘xtatib turishga sabab bo‘lgan holatlar barham topgach, ishda ishtirok etuvchi shaxslarning arizasiga muvofiq yoki sudning tashabbusi bilan tiklanadi.
Ish yuritish tiklanganida sud ishda ishtirok etuvchi shaxslarni umumiy asoslarda chaqiradi.
Sud ishini to‘xtatish sud qaroriga ko‘ra amalga oshadi va yuqoridagi sudlarga shikoyat arizasi bilan murojat qilish mumkin. To‘xtatilgan sud ishi yana sudning o‘z tashabbusi yoki ishda ishtirok qilayotgan shaxslarning iltimoslariga ko‘ra qayta davom qildiriladi.