Ishni mazmunan ko‘rishni boshlash qismi raislik qiluvchining ish to‘g‘risidagi ma’ruzasidan boshlanadi. So‘ngra raislik qiluvchi da’vogardan o‘z talablarini quvvatlash-quvvatlamasligini, javobgardan da’vogarning talablarini tan olish-olmasligini va taraflarning ishni kelishuv bitimi bilan tamomlashni istash-istamasliklarini so‘raydi.
Da’vogarning arz qilgan talablaridan voz kechganligi, javobgarning da’vogar talablarini tan olganligi yoki taraflar erishgan kelishuv bitimining shartlari sud majlisi bayonnomasiga kiritiladi va tegishlicha, da’vogar, javobgar yoki ikkala taraf tomonidan imzolanadi. Agar da’vogarning arz qilgan talablaridan voz kechganligi, javobgarning da’vogar arz qilgan talablarni tan olganligi yoki taraflarning kelishuv bitimi ularning sudga yuborgan yozma arizalarida ifodalangan bo‘lsa, mazkur arizalar ishga qo‘shib qo‘yilib, bu haqda sud majlisi bayonnomasida ko‘rsatiladi.
Da’vogarning arz qilgan talablaridan voz kechganligini qabul qilishdan yoki taraflarning kelishuv bitimini tasdiqlashdan oldin sud da’vogarga yoki taraflarga tegishli protsessual harakatlar qilishning oqibatlarini tushuntiradi.
Ish to‘g‘risida ma’ruza qilinganidan so‘ng, sud da’vogar va uning tomonida ishtirok etuvchi uchinchi shaxsning, javobgar va uning tomonida ishtirok etuvchi uchinchi shaxsning, shuningdek ishda ishtirok etuvchi boshqa shaxslarning tushuntirishlarini eshitadi. Boshqa shaxslarning huquqlari va qonun bilan qo‘riqlanadigan manfaatlarini himoya qilish maqsadida ariza bergan prokuror, shuningdek boshqa shaxslar arz qilgan talablari bo‘yicha tushuntirishlar berish yoki ularni asoslash uchun birinchi bo‘lib so‘zga chiqadilar. Ishda ishtirok etuvchi shaxslar bir-birlariga savollar berishga haqlidirlar.
Sud taraflarning va ishda ishtirok etuvchi boshqa shaxslarning tushuntirishlarini eshitib, guvohlarni, ekspertlarni so‘roq qilish hamda boshqa dalillarni tekshirish tartibini belgilaydi.
Har bir guvoh sud majlisida alohida so‘roq qilinadi va so‘roqdan so‘ng, agar sud unga ilgariroq ketishga ruxsat bermasa, to ishni ko‘rib chiqish tamom bo‘lguncha sud majlisi zalida qoladi. Raislik qiluvchi guvohni so‘roq qilishdan oldin uning shaxsini, yoshini, mashg‘ulot turini, shu ishga aloqasini hamda taraflar va ishda ishtirok etuvchi boshqa shaxslar bilan o‘zaro munosabatini aniqlaydi, shuningdek uni bila turib yolg‘on ko‘rsatuv berganlik uchun Jinoyat kodeksining 238-moddasiga muvofiq javobgar bo‘lishi to‘g‘risida ogohlantiradi. Shundan keyingina guvohga savollar berilishi mumkin, chunonchi guvoh kimning arizasi bo‘yicha chaqirilgan bo‘lsa, ana shu shaxs va uning vakili birinchi bo‘lib, so‘ngra esa, ishda ishtirok etayotgan boshqa shaxslar guvohga savollar beradi. Sudning tashabbusi bilan chaqirilgan guvohga savollarni birinchi bo‘lib da’vogar beradi.
Do'stlaringiz bilan baham: |