Ўзбекистон республикаси адлия вазирлиги тошкент давлат юридик институти шорахметов шоакбар шорустамович

384-м о д д а. Ҳал қилув қарорининг қайтарма ижроси
тўғрисидаги масаланинг апелляция, кассация
ёки назорат инстанцияси судида ҳал
қилиниши


Ишни апелляция, кассация шикояти бўйича ёки назорат тартибидаги протест бўйича кўриб чиқаётган суд, агар ўзининг ажрими ёки қарори билан ҳуқуқ тўғрисидаги низони узил-кесил ҳал қилса ёки иш юритишни тамомласа, ҳал қилув қа­рорининг қайтарма ижроси тўғрисидаги масалани ҳал қилиши ёки уни ҳал қилиш учун биринчи инстанция судига топши­риши шарт.
Агар юқори суднинг ажримида ёки қарорида қайтарма ижро тўғрисидаги масала бўйича ҳеч қандай кўрсатма бўлмаса, жавобгар биринчи инстанция судига тегишли ариза беришга ҳақли. Биринчи инстанция суди бу аризани ушбу Кодекс 383-моддасининг қоидаларига биноан кўриб чиқади ва ҳал қилади.

Биринчи инстанция судининг кўрган фуқаролик иши юзасидан манфаатдор шахснинг берган шикояти, прокурорнинг протести асо­сида иш апелляция, кассация ёки назорат тартибида кўриб чиқиш жараёнида ҳал қилув қарорини ўзгартириши, бекор қилиниши ҳақидаги қарорларида ҳал қилув қарорини қайтарма ижроси тўғри­сидаги масалани ҳал қилмаган бўлсалар, бундай ҳолларда юқори судлар бу масалани ҳал этиш учун биринчи инстанция суди томо­нидан кўриб ҳал қилиши лозимлиги ҳақида ўз қарорида ифода­лаган бўлиши лозим.

Юқори судлар томонидан биринчи инстанция судларига қайтарма ижро тўғрисидаги масалани ҳал этишга оид кўрсатмалар беришга айрим ҳоллардагина йўл қўйилиши мумкин. Агар янги очилган ҳолатлар бўйича масалани ҳал этиш учун апелляция, касса­ция ва назорат инстанцияси судларида етарли асослар бўлмаган тақдирда ва бу асослар қуйи судларда мавжуд бўлган ҳоллардагина йўл қўйилишига эътибор бериш лозим.
Агар ҳал қилув қарорининг қайтарма ижроси тўғрисида юқори суднинг ажримида ёки қарорида ҳеч қандай кўрсатма бўлмаган тақдирда, эркин ҳуқуқ принципи асосида жавобгар бу ҳақда биринчи инстанция судига, ҳал қилув қарорни қайтарма ижроси ҳақида ариза билан мурожаат этишга ҳақли.