Ўзбекистон республикаси адлия вазирлиги тошкент давлат юридик институти шорахметов шоакбар шорустамович

35³-боб. ҲАКАМЛИК СУДИНИНГ ҲАЛ ҚИЛУВ ҚАРОРИНИ МАЖБУРИЙ ИЖРО ЭТИШ УЧУН ИЖРО ВАРАҚАСИ БЕРИШ ТЎҒРИСИДАГИ ИШЛАРНИ ЮРИТИШ


309⁹-м о д д а. Ҳакамлик судининг ҳал қилув қарорини
мажбурий ижро этиш учун ижро варақаси
беришнинг умумий қоидалари


Ушбу бобда белгиланган қоидалар ҳакамлик муҳокамаси тарафларининг ҳакамлик судлари ҳал қилув қарорларини мажбурий ижро этиш учун ижро варақалари бериш тўғриси­даги аризалари суд томонидан кўриб чиқилаётганда қўлла­нилади.
Ҳакамлик судининг ҳал қилув қарорини мажбурий ижро этиш учун ижро варақаси бериш тўғрисидаги масала ҳакамлик судининг ҳал қилув қарори ҳакамлик муҳокамаси тарафлари­дан қайси бирининг фойдасига чиқарилган бўлса, ўша тараф­нинг аризасига биноан суд томонидан кўриб чиқилади.
Ҳакамлик судининг ҳал қилув қарорини мажбурий ижро этиш учун ижро варақаси бериш тўғрисидаги ариза қарздор яшайдиган жойдаги ёки жойлашган ердаги ёхуд, агар қарздор яшайдиган жой ёки жойлашган ер номаълум бўлса, унинг мол-мулки турган жойдаги судга берилади.


1. Шарҳланаётган боб ҳакамлик судининг ҳал қилув қарорини мажбурий ижро этиш учун ижро варақасини бериш тўғри­сидаги қоидаларни белгилайди.
Ҳакамлик суди нодавлат суд бўлгани ҳолда давлат судининг қарори эга бўлган кучга тенг қарорни чиқаради, лекин унинг мажбурий ижро этилишида ўзига хос жиҳатларга эга. Ҳакамлик судининг қарори ҳакамлик муҳокамаси тарафлари учун мажбурий аҳамиятга эга ва ҳакамлик процессининг иштирокчилари бўлмаган бошқа юридик ва жисмоний шахслар учун мажбурий эмас. Шу муносабат билан ҳакамлик судининг ҳал қилув қарорини мажбурий ижро этилишини таъминлаш механизми зарур бўлиб, у Ўзбекистон Республикаси Фуқаролик процессуал кодексининг 35³-боби билан тартибга солинган.
2. Ҳакамлик судининг қарорини бошқа тараф ижро этмаган тақдирда, ҳакамлик судининг ҳал қилув қарори унинг фойдасига чиқарилган ҳакамлик муҳокамаси тарафи унинг мажбурий ижро этилиши учун судга ижро варақасининг берилиши тўғрисидаги ариза билан мурожаат қилиши мумкин.
3. Шарҳланаётган модданинг учинчи қисми ҳакамлик судининг қарорини мажбурий ижро этилиши масаласининг судловга тегиш­лилиги қоидаларини белгилайди. Ўзбекистон Республикасининг Фуқаролик процессуал кодексига кўра, қарздорнинг яшаш манзи­лидаги ёки агар қарздорнинг яшаш манзили маълум бўлмаган ҳолларда унинг мулки жойлашган манзилдаги суд ҳакамлик суди қарорини мажбурий ижро этиш учун ижро варақаси бериш тўғрисидаги аризани тақдим этиш жойи деб белгиланади.