Ўзбекистон републикаси

Назорат саволлари:
1.Геологик ҳужжатлаш деб қандай ҳужжатлашни тушунасиз?
2.Қандай материаллар геологик ҳужжатлаш материаллари ҳисобланади?
3.Геологик ҳужжатлашнинг қандай стандарт шаклларини мавжуд?
4. Геологик таналарнинг макондаги холатини ва ўлчамларини аниқ кўрсатиш учун қандай иш турлари бажарилади?
5.Топо–геодезик ишларни бажаришда қандай операциялар амалга оширилади?
6. Маркшейдерлик ишларида қандай ишлар амалга оширилади?
7.Геологик ҳужжатлашнинг мазмуни ва шакллари деганда нимани тушунасиз?
8. Канавалар нима ва улар қандай ҳужжатлаштирилади?
9.Канаваларни ҳужжатлаш қандай кетма-кетликда амалга оширилади?
10. Шурфларни ҳужжатлаш қандай тартибда амалга оширилади?
11. Ер ости лаҳимига қандай лаҳим турлари киради ва уларнинг ҳужжатлаш тартиби қай тарзда олиб борилади?
12. Штольняларни ҳужжатлаш қандай тартибда амалга оширилади?
13.Шахталарни ҳужжатлаш тартиби шруфларни ҳужжатлаш тартибидан қандай фарқ қилади?
14.Бурғулаш қудуқларини ҳужжатлаш қандай тартибда амалга оширилади?
X-БОБ. ФОЙДАЛИ ҚАЗИЛМА КОНЛАРИНИ ГЕОЛОГИК - ИҚТИСОДИЙ БАҲОЛАШ
10.1. Фойдали қазилма конларини баҳолаш тамойиллари
Конларни геологик–иқтисодий жиҳатдан баҳолаш қуйидаги мақсадларни кўзлаб амалга оширилади:

Фойдали қазилма конларини геологик–иқтисодий жихатдан баҳолашнинг энг муҳим тамойиллари қуйидаги схемада акс эттирилган:

а.Мамлакат иқтисодиётини минерал хом ашёларга бўлган эхтиёжларини максимал қондириш тамойили. Геологик–иқтисодий баҳолаш ҳар доим ҳам қиёсий ва вақтинчалик ҳарактерга эга бўлади. Маълум вақт давомида ҳар бир аниқ коннинг ижобий ёки салбий томондан баҳолаш, бир томондан, мамлакатнинг у ёки бу минерал хом ашёга бўлган эхтиёжига, иккинчи томондан, минерал хом ашёлар базасининг холатига(разведка қилинган ва эксплуатацияга тайёрлаб қўйилган захиралар балансига) боғлиқ.
Умумий холатда у ёки бу минерал хом ашёларга бўлган эхтиёжнинг ошиб бориши барча камбағал конларни ҳам ўзлаштириш заруриятини туғдиради. Бунинг учун аввал саноат аҳамиятига эга бўлмаган деб қаралган конлар қайта баҳоланадилар. Аксинча, янги очилган, олдинроқ ўзлаштирилиши кўзда тутилган бой конлар саноат аҳамиятига эга бўлмаган конлар қаторига киритилиши ҳам мумкин. Конларни баҳолашда уларни ишга тушириш, минерал хом-ашёларни бойитиш ва қайта ишлаш жараёнларида фан ва техника ютуқларини амалиётга тадбиқ этиш муҳим аҳамиятга эга. Фан, техника ва технологиялардаги бугунги кунда эришилаётган ютуқлар минерал хом ашёлар ишлаб чиқаришдаги сарф ҳаражатларни тизимли равишда камайтириб бориш, катта чуқурликларда ва нисбатан мураккаб тоғ-техник ва гидрогеологик шароитларда ҳосил бўлган барча камбағал маъдан конларини ҳам ишга тушириш имконини беради.
Илмий янгиликлар, янги, нисбатан қудратли техникаларни ёки илғор технологияларни тоғ–кон саноатига тадбиқ этилиши конларни баҳолашни тубдан ўзгартириб юборишга олиб келганлиги ҳақида кўплаб мисолларни келтириш мумкин. Масалан, Чехиядаги уран–радийли кондан бир неча юз йиллар давомида аввал кумуш, сўнг кобальт, ундан сўнг радий қазиб олинган ва ўтган асрнинг 50-йилларидан бошлаб ҳозирга қадар чиқинди сифатида ташлаб юборилган уран маъданлари муҳим аҳамият касб эта бошлади.
Шунингдек, собиқ иттифоқ даврида Ўзбекистон худудидаги Мурунтов олтин кони маъданлари таркибидан маълум миқдорда олтин ажратиб олиниб, ташлаб юборилган олтин чиқиндиларини иккиламчи қайта ишлашнинг янги технологияларини қўлаш натижасида чиқинди таркибидан қўшимча олтин ажратиб олиш йўлга қўйилди. Бундай мисолларни жуда кўплаб келтириш мумкин.
Фан, техника ва технологияларни табора ривожланиб бориши, янги саноат тармоқларини пайдо бўлиши билан захиралар баланси ва мамлакат иқтисодиётининг минерал хом ашёларга бўлган эҳтиёжи ўртасидаги нисбат ўзгаришлари билан боғлиқ баҳолаш ишларини бажаришда янги параметрлардан фойдаланиш ёки мавжудларини қайта кўриб чиқиш лозим.
б. Баҳолаш кўрсатгичларини нисбатан тўлиқ ва ишончли аниқлашга босқичма–босқич яқинлашиш тамойили. Конларни геологик–иқтисодий жихатдан баҳолаш кон ва кон нишоналарини босқичли ўрганиш заруриятидан келиб чиқилади. Баҳолаш кўрсатгичлари барча босқичларда бир хил бўлади, фақат мақсади, тўлиқлиги, тавсийлилиги ва ишончлилиги ўзгариб туради. Қидириш босқичларида баҳолаш кўрсатгичлари саноат аҳамиятига эга бўлмаган кўп сонли маъдан нишоналари орасидан биринчи навбатда ўрганишга арзийдиганларини танлаб олиш учун керак. Бу босқичда баҳолаш кўрсатгичларининг аниқлиги танлаб олинган истиқболли маъдан нишоналарини дастлабки разведка қилиш темпи ва муддатларини ўрганиш кетма–кетлигини тўғри белгилаш учун етарли бўлиши лозим.
Дастлабки разведка босқичи жавобгарлиги жуда юқори бўлган босқич ҳисобланади. Бу босқичда коннинг саноат аҳамияти, уни тегишли саноат тармоғи иқтисодиётидаги ўрни тўла аниқланган, уни ўзлаштириш муддатлари ва темпи кўрсатилган бўлиши лозим. Дастлабки разведка маълумотларига мувофиқ тавсилий разведка ўтказиш учун участкалар кўзда тутилади. Уни ўтказиш миқёси ва муддатлари аниқланади. Тавсилий разведка учун участка танлашда ҳатоликларга йўл қуймаслик мақсадида, бу босқичда олиб бориладиган разведканинг баҳолаш кўрсатгичлари нафақат бутун кон бўйича балки, унинг айрим участкалари бўйича ҳам етарли даражада аниқ бўлиши керак.
Тавсилий разведка босқичидаги кўрсатгичларнинг аниқлиги, рудник қурилиши(тоғ-маъдан корхонаси структурасини, қазиб олиш усуллари ва тизимларини, маъданлар шихтовкасини, турларини, иншоотлар сони ва қувватини, минерал хом–ашёларни қазиб олиш ва қайта ишлаш бўйича барча операциялар режими ва меҳнат ҳажмини тўғри танлаш) ва эксплуатациясини (қоплама жинслар ва маъданларни қазиб олиш, маъданларни бойитиш, концентратлар ишлаб чиқариш, материаллар сарфи ва х.к. бўйича ишлар ҳажмини) режалаштириш тезкорлигини таъминлаши лозим.
Баҳолаш кўрсатгичларининг аниқлиги энг аввало геологик кузатувларнинг ишончлилигига, кон структураларининг ишончли талқин этилганлигига, маъданли таналарнинг ётиш шароитларига, морфологияларига ва ички тузилишига, технологик тадқиқотларнинг мақсадга мувофиқ олиб борилганлигига боғлиқ. Бундан кўриниб турибдики, биринчи бочқичдан бошлаб регион геологиясини чуқур ўрганиш ва таҳлил қилиш, маъданлар мавжудлигини назорат қилувчи омиллар, маданлашишнинг генетик турлари, уларнинг у ёки бошқа структуралар билан алоқалари, маъданлардан мажмуавий фойдаланиш имкониятларининг мавжудлиги каби омиллар жуда катта рол ўйнайди.
Шуни ҳам алоҳида такидлаш жоизки, кўпинча геологик–иқтисодий баҳолаш натижалари етарли даражада ишончли бўлмаслиги, ҳатто қидириш ишларини олиб бориш жараёнларида йўл қўйилган камчиликлар сабабли улар умуман ҳато бўлиши ҳам мумкин. Бундай ҳатоликларга қуйидаги ҳатоликларни киритиш мумкин: район структурасини нотўғри аниқлаш, маъданлар мавжудлигини назорат қилувчи омилларни нотўғри тушиниш, маъданларнинг минералогик ва кимёвий таркибларини етарли даражада тўла ўрганмаслик, маъдан турларини нотўғри ажратиш, маъдан вакили ҳисобланмаган жинслардан намуналар олиш ва х.к.
Кўпинча “конларни қидириш босқичларида аниқланган конлар бўйича тоғ–маъдан корхоналарининг йиллик қувватини, уни ўзлаштиришга кетадиган сарф ҳаражатларни, рентабеллилигини ва бошқа кўрсатгичларни аниқлаш мумкинми” деган савол туғилади. Бундай саволга хеч иккиланмасдан “нафақат мумкин, балки албатта керак” деб жавоб бериш лозим. Чунки бу кўрсатгичларсиз топилган конлар ичидан энг яхшиларини ажратиб олиш имконияти бўлмайди, шунингдек, бутун геологик-разведка ишларини самарали режалаштириш ҳам мумкин эмас.
Табиийки, қидириш босқичларида маъданлар сифати ва минерал хом ашёларнинг захиралари экстраполяциялашдан кенг фойдаланиб аниқланади, уни қазиб олишга кетган ҳаражатлар эса–эксплуатация қилинаётган (ёки тавсилий разведка қилинган) ўхшаш конларники билан қиёсланади. Геолог маъданнинг генетик ва тоғ–саноат турларини, уларни қазиб олиш ва қайта ишлаш иқтисодини тўла билса, уни янги аниқланган маъдан нишоналарига ва конларга берган баҳоси шунча аниқ бўлади.
Дастлабки разведка босқичида барча баҳолаш кўратгичлари, шу жумладан, техник–иқтисодий кўрсатгичлар ҳам коннинг чизмалардаги моделини қуриш, контурлаш ва йириклаштирилган ҳисоб китоблар йўли билан аниқланади. Ваниҳоят, тавсилий разведка босқичида бундай ҳисоб китоблар рудник қурилиши ва кон эксплуатацияси босқичларига қатъий боғланади. Бир босқичдан бошқасига кон ҳақидаги тасаввурлар тўлдирилиб ва аниқликлар киритилиб борилади, мос равишда барча ҳисоблар қайта текширилиб, ўзгаришлар ҳисобга олинади. Баҳолаш кўрсатгичларини нисбатан тўлиқ ва ишончли аниқлашга босқичма–босқич яқинлашиш тамойилининг мазмуни айнан шунда ўз ифодасини топади.
Шундай қилиб, баҳолаш услуби ва кўрсатгичлари конларни ўрганишнинг барча босқичларида бир хил.