Xolatini tuzatish

Texnologiya darslarida yangi pedagogik texnologiyalardan foydalanishning ahamiyati
Sanobar Abdurahmonova

Farg`ona viloyati Dang`ara tumani 4-umumta`lim maktabi

texnologiya fani o`qituvchisi
Hozirgi kundagi ta`limning rivojlanish darajasi hamda o`quvchilarning bilim olishga bo`lgan ehtiyojlari va intilishlari o`qituvchidan darslarni sifatli va mazmunli, ilg`or pedagogik texnologiyalardan foydalanib tashkillashni taqazo etmoqda.

Bizning texnologiya fanimizda ham ko`plab bunday pedagogik texnologiyalardan foydalanish mumkin. “BBB”, “Ven diagrammasi”,”Xotira mashqi”,”Kim chaqqon” kabi metodlar shular jumlasidandir.

Bundan tashqari bugungi kun o`qituvchisi izlanuvchan, ijodkor va tashabbuskor bo`lishi kerakligini ham unutmasligimiz lozim. O`quvchilarning fanga qiziqihlarini oshirish va ularning diqqatini jamlash uchun o`qituvchining o`zi ham turli turli usullar va harakatli o`yinlar ijod qilib darslarda foydalanishi darslarni qiziqarli va samarali o`tishini ta`minlaydi.

Bu borada men o`zim o`ylab topgan va darslarimda keng foydalanayotgan “Alpinist” metodi haqida o`rtoqlashmoqchiman. Ma`lumki, texnologiya darslarining mustahkamlash bosqichi amaliy ish bajarish tarzida o`tkaziladi. Bu metoddan esa darsning nazariy qismida, o`tilgan mavzuni takrorlash bosqichida foydalanish mumkin.

60 X 80 sm o`lchamda, orqasida ikkita parallel metal lenta tortilgan stendning ikki tomoniga 5 tadan zinapoya shaklida cho`ntaklar yopishtiriladi . Cho`ntaklar yonida metall lentalarning yo`nalishi bo`ylab qo`lda harakatlantiriladigan qo`g`irchoqlar o`rnatiladi . Men Servis yo`nalishi bo`yicha dars berganim uchun qiz bola shaklidagi qo`g`irchoqdan foydalanaman.Qizlarning qo`g`irchoq shaklidagi soch to`g`nog`ichlarining orqa qismiga magnit mahkamlab, metal lentada harakatlanishini ta`minlaganman .Cho`ntaklarga o`tilgan mavzu bo`yicha savollar yozib teskari qilib solinadi. Har ikki guruhdan bir vaqtda bittadan o`quvchi chiqadi, birinchi zinadagi savolni olib javob beradi. Savolga to`g`ri javob bergan o`quvchi “alpinist”ni keyingi yuqoridagi zinaga siljitib qo`yadi. Shu tariqa qo`g`irchoqlarning qaysi biri “Bilim cho`qqisi”ga birinchi bo`lib yetib borsa,o`sha guruh g`olib hisoblanadi.

Bu usul o`quvchilarni tez fikrlashga, hozirjavoblikka va o`tilgan mavzuni puxta o`zlashtirishga o`rgatadi.