Vi-боб валикли жинлар § Валикли жинларга қўйиладиган технологик талаблар ва уларнинг классификацияси

VI-боб
ВАЛИКЛИ ЖИНЛАР
§ 1. Валикли жинларга қўйиладиган технологик талаблар ва уларнинг классификацияси
Валикли жинлар пахта тозалаш корхоналарининг жинлаш бўлинмасига ўрнатилади ва уларнинг вазифаси механик тарзда узун толали пахта селекция навлари чигитидан толани ажратиб олиш.
Валикли жинларга қўйиладиган технологик талаблар:
- толани чигитдан ажратиш вақтида жинлаш валиги ва урувчи барабаннинг пахтага таъсирида тола бурамлари ҳосил бўлмаслиги ва чигитни шикастлантирмаслиги керак;
- тола таркибига чигит синиқлари аралашмаслиги, ҳамда толанинг ифлосланиш даражаси минимал қийматда бўлиши керак;
- чигит таркибида тола миқдори кам бўлиши керак;
- жинни пахта хом ашёси билан таъминлаш ва тозалаш жараёнини ростлаш учун таъминлаш-тозалаш агрегати бўлиши керак;
- толани улюк ва ифлосликлардан тозалаш учун жин таркибида тола тозалаш қисми ҳам бўлиши керак;
- валикли жин конструкциясида жиннинг унумдорлигини ростловчи, қўзғалмас пичоқни валикка сиқиш жараёнини, жинлаш валигининг температурасини ва тозалаш самарадорлигини назорат қилувчи қурилма ва механизмлар бўлиши керак.
Валикли жин пахтани дастлабки ишлаш оқими ускуналарининг бир қисми эканлигини инобатга олган ҳолда, лойиҳалаш даврида унинг габарит ўлчамларига, жойлашувига, эстетикасига қўйиладиган талабларни хисобга олиш керак бўлади.
Валикли жинларнинг классификацияси. Валикли жинлар ишчи қисмларининг конструкциясига кўра қуйидагича классификацияланади:
- жинлаш валиги сонига қараб бир валикли ва икки валикли;
- қўзғалмас пичоқ тиғидан чигитни олиш учун илгариланма-қайтма ҳаракатланувчи бир тарафлама таъсир қилувчи ҳаракатланувчи пичоқли ва икки тарафлама таъсир қилувчи пичоқли жинларга;
- урувчи барабан конструкциясига кўра илгариланма-қайтма ҳаракатланувчи урувчи, ҳамда айланма харакатланувчи қисмли жин ва ўз навбатида улар хам қаттиқ ва юмшоқ урувчи қисмли жинларга ажратилади;
- тўлиқ жинланмаган чигитларни регенерация қилиш усулига кўра индивидуал регенерация жараёнига эга бўлган жин ва умумий батареяли регенерация жараёнига эга бўлган жинлар;
- тола тозалаш усулига кўра: тола тозалаш қисмига эга бўлган ва умумий батареяли тола тозалагичли жинлар.