«ветеринария» ихтисослиги бўйича олий ўҚув юртлари учун қЎлланма ички юқумсиз касалликлар фанидан

Режа:
23.1. Остеодистрофия билан касалланган ҳайвонни қабўл қилиш.
23.2. Қўшимча минералли аралашмалар.
Машғулотнинг мақсади: талабаларга остеодистрофияни даволаш ва қўшимча минералли аралашмаларни касал ҳайвонга қўллашни ўргатиш.
Керакли жиҳоз, реактив ва асбоб-ускуналар: Қўшимча минералли аралашмалар намуналари, стерил шприц ва игналар, клиник текшириш асбоблари, клиник соғлом ва касал ҳайвонлар.
Машғулотнинг бориши: Остеодистрофия (Osteodistrophia) - сурункали касаллик бўлиб, суяк тўқимасида ҳолидаги дистрофик ўзгаришлар (остеомаляция, остеопороз ва остеофиброз) кузатилиши билан тавсифланади. Сабабларига кўра, алиментар, иккиламчи, ва энзоотик остеодистрофиялар фарқланади. Асосан қорамоллар касалланади.
Сабаблари. Алиментар остеодистрофиянинг келиб чиқишига озиқалар билан организмга кальций ва фосфорнинг етарли даражада тушмаслиги ҳамда рационда протеин, углеводлар ва Д - витаминининг етишмаслиги сабаб бўлади. Бу ҳолат кўпинча силос - жом типида боқилганда ва омихта ем, пичанлар миқдори етарли бўлмаганда кузатилади. Рациондаги силос, жом, барда каби озиқалар миқдори ортиқча ва пичанлар миқдори етишмаганда ҳайвонларнинг кальций, фосфор, магний, олтингугурт, йод, кобальт, рух, мис, А, Д, Е витаминлари ҳамда протеинга бўлган эҳтиёжлари тўлиқ қондирилмайди. Рациондаги кальцийнинг фосфорга нисбатининг 2:1 дан юқори бўлиши ҳазм трактида фосфорнинг сўрилишини ёмонлашишига сабаб бўлади. Бундай ҳолат рациондаги фосфорнинг миқдори ортиқча бўлганда ҳам кузатилади.
Сигирларда иккиламчи дистрофия кетоз касаллигига сабаб бўладиган омиллар оқибатида келиб чиқади ва рационда кальций, фосфор ва бошқа минерал моддалар ҳамда протеин, углеводларнинг етарли бўлмаслигига боғлиқ эмас. Ҳайвонларнинг энзоотик остеодистрофия билан касалланишига тупроқ ва озиқалар таркибида марганец ва кобальт элементларининг кам миқдорда бўлиши ҳамда никель, магний, стронций ва барийнинг ортиқчалиги сабаб бўлади. Айрим ҳудудларда касалликнинг сабабларида озиқалар ва сув таркибида йод, кобальт, рух, мис, марганец, молибденнинг танқислиги ҳамда хром, никель ва ванадийнинг ортиқча бўлиши асосий аҳамиятга эга.