«ветеринария» ихтисослиги бўйича олий ўҚув юртлари учун қЎлланма ички юқумсиз касалликлар фанидан

Даволаш. Ҳайвонларни кислоталиги юқори бўлган силос сенаж, барда каби озиқалар билан боқишнинг олди олинади, рациондаги клетчаткага бой озиқалар миқдори кўпайтирилади. Кавшовчи ҳайвонлар учун клетчатканинг миқдори рацион қуруқ моддасининг 15-18 фоизини ташкил этиши лозим. Ҳайвонларни оқсилли, углеводлар, витаминлар ва минерал моддалар билан озиқлантириш меъёрларига амал қилинади. Рациондаги кальцийнинг фосфорга нисбати 1,5-2:1 бўлиши лозим. Ҳайвонларда остеодистрофиянинг белгилари кузатилганда уларга ҳоҳлаганича беда ёки ҳар хил ўтлар пичани, сифатли силос, илдизмевалилар берилади, концентрат озиқалар бериш кўпайтирилади. Ёз ойларида кўк озиқаларга қўшимча сифатли пичан ва концентратлар берилади. Озиқлантириш меъёри 20-25% га кўпайтирилади.
Кальций, фосфор, азот ва бошқа моддаларнинг қўшимча манбаи сифатида озиқабоп фосфатлар (озиқабоп кальций-фосфат, монокальцийфосфат, диаммоний-фосфат, озиқабоп преципитат, фосфат мочевина ва б.), рационда етишмайдиган микроэлементларнинг тузлари, А ва Д витаминларининг ёғли концентратлари, балиқ ёғи ёки микрогранулланган витаминли препаратлар қўлланилади. Д₃ витаминининг эндоген синтезини яхшилаш учун ҳайвонларни очиқ ҳавода яйратиш, ультрабинафша нурлар берадиган лампалардан фойдаланиш тавсия этилади.
Фалаж ёки қалтироқлар кузатилганда катта ҳайвонларга 10 фойизли кальций хлорид ёки кальций глюконат эритмасидан 400 мл гача, 10 фойизли магний сульфат эритмасидан 100 мл вена қон томирига юборилади, ёки 25 фойизли магний сульфат эритмасидан 100-150 мл гача мускул орасига инъекция қилинади. Чунки, магний сульфат эритмаси инъекция қилинмасдан фақат кальций хлорид эритмаси қўлланилиши етарлича самара бермайди. Калий ва магнийга бой препарат сифатида камагсол қорамолларга 100-400 мл, отларга 50-250 ва қўйларга 10-20 мл вена қон томирига юборилади. Фосфорга бой препарат сифатида фосфосан қорамолларга 1 кг тана вазнига 0,2-0,4 мл, қўй ва эчкиларга 0,1-0,2 мл ҳисобида жуда секинлик билан вена қон томирига юборилади. 24 соатдан кечин инъекция қайтарилиши мумкин. Глюкоза эритмалари вена қон томирига 0,2-0,4г/кг миқдорда юборилади ёки 300-500 г қанд оғиз орқали ичирилади.


Остеодистрофияни профилактика қилишда қўлланиладиган минерал қўшимчалар (1бошга 1 кунда, г).

Ҳайвон-лар гуруҳи	Суяк уни	Суяк кули	Прецепитат	Фторсиз-лантирилган фосфат	Монокальций фосфат	Мононатрий фосфат	Диаммоний фосфат
Соғин сигир	60-200	60-200	75-200	70-200	35-150	60-150	80-200
Сутдан чиқарил-ган сигир	50-150	40-150	70-100	70-150	25-100	40-80	50-100
Насиллик буқа	50-100	50-100	50-100	60-200	30-80	40-50	50-60
1 ёшгача бузоқ	15-20	15-40	20-50	25-70	10-30	10-30	10-40
1 ёшдан катта бузоқ	40-90	40-90	55-100	70-100	25-50	30-80	40-100
Совлиқ-лар	5-10	5-15	5-15	5-15	1-1,5	-	-
Қўзилар	5-7	5-7	5-7	5-7	1-1,5	-	-
Она чўчқа	50-100	40-100	90-100	50-70	30-60	-	-
Биялар	60-120	60-120	40-80	30-65	50-90	-	-

Алиментар остеодистрофияни даволаш ва олдини олишда алост (таркиби: диаммонийфосфат, кальций фосфат, мгний сульфат, натрий гидрокарбонат, кобальт, мис, рух, марганец, йод тузлари, меласа ёки қанд, А, Д, Е витаминлари ва тўлдирувчи восита) аралашмасидан фойдаланиш яхши натижа беради. Алост аралашмаси ҳайвонларга озиқаларга аралаштирилган ҳолда 30-40 кун ва ундан кўп вақт давомида, суткалик доза иккига бўлиниб, эрталаб ва кечқурун берилади.

Иккиламчи остеодистрофияни даволашда асосий касаллик ҳисобланган кетознинг сабаблари йўқотилади. Даволаш тадбирлари комплекс тарзда ташкил этилиб, мода алмашинувлари, озиқаларнинг ката қоринда ҳазмланиши, эндокрин аъзолар, жигар, юрак, буйрак ва бошқа аъзолар функцияларини тиклашга қаратилган бўлиши лозим. Кетост аралашмаси 30-40 кун давомида концентрат озиқаларга аралаштирилган ҳолда қўлланилади.
Агар хўжаликда кетост аралашмасини топишнинг имконияти бўлмаса, унинг мавжуд бўлган компонентлари қуйидаги дозаларда қўлланилади (1 бошга 1 кунда): натрий гидрокарбонат – 75-100 г, магний сульфат – 70-80 г, оксафенамид – 5 г, марганец сульфат – 1 г, Рух сульфат – 1 г, мисс сульфат – 200 мг, кобальт хлорид – 30 мг, А витамини – 400-600 минг ХБ, Д витамини – 100-150 минг ХБ, Е витамни – 250-400 мг. Даволаш курси 20-25 кундан кам бўлмаслиги керак.
Профессор Қ.Н.Норбоев ва доцентлар Б.Б.Бакиров ва Б.М.Эшбуриевлар сигирларда эндемик остеодистрофияни гуруҳли профилактика қилишда таркиби микроэлементлар ва витаминлар препаратларидан иборат ЛПП-1 ва ЛПП-2 даволовчи профилактик мажмуасини тавсия этишади.