ЎҚув методика маркази

Кутилаётган натижалар:
Болаларнинг богланган нутқи ва товуш маданияти ривожланади.
Болалар нутқда от ва сифатларни тўғри ишлатишга ўрганадилар. Сўздан товушни ажратишга ўрганадилар.
Керакли жиҳозлар:
Ҳайвонлар тасвири
Эртакни саҳналаштиш учун либослар
Машғулотнинг бориши
Тарбиячи ҳайвонлар тасвирига болалар эътиборини қаратиб сўрайди:
1. Болалар, суратда қайси ҳайвон тасвирланган?
2. Эчки ҳақида қандай эртакларни биласиз?
Ҳозир, сизларга “Бўри билан эчки” эртагини ўқиб бермоқчиман. Сиз эшитишни ҳоҳлайсизми? (Тарбиячи эртакни ифодали қилиб ўқиб беради ва асар мазмуни бўйича суҳбатлашади).
1. Эчки нима учун бўрига дуч келди?
2. Бўри билан эчки нималар ҳақида суҳбатлашдилар?
3. Эчки қандай ҳийла ўйлаб топди ва нима қилди?
4. Бўри қай аҳволга тушиб қолди?
5. Бўрининг эчкига айтган жавобини ким ўзига
ўхшатиб айтиб беради?
6. Эчкининг бўрига айтган жавобини ким оҳангли қилиб
айтади?
7. Бўрининг ҳушидан кетиб ўзига келган аҳволини
ачинарли қилиб ким айтиб беради?
Асарни тарбиячи яна бир бор ўқиб беради. Болаларга яхшилаб тинглашларини, эслаб қолишларини, кейин сўзлаб беришларини айтади.
Энди ким эртакни бошидан гапириб беради?
Эртакни худди машқ қилганимиздек таъсирли, ифодали қилиб сўзлаб беришингиз керак (3–4 боланинг жавоби эшитилади).
“Ўйланг, биргаликда ўзаро фикр алмашинг” ўйини асосида грамматик машқ.
Бу ўйинда болалар берилган топшириқ устида биргаликда фикр юритишга, ўз фикрларини ихчам, аниқ ифодалашга жалб қилинади. Тарбиячи берган топшириқ бўйича болалар жуфт- жуфт бўлиб ўз фикрларини ўртоқлашадилар ва биргаликда бир хулосага келадилар. Бунинг учун тарбиячи болаларни гуруҳларга тақсимлаб олиши керак. Болаларни гуруҳларга тақсимлашда битта тез қабул қиладиган, битта секин қабул қиладиган болани танлаб олиши керак. Гуруҳлар ишлаётган вақтда тарбиячи болаларга ёрдам бериши, тушунмаган жойларини тушунтириб бериши керак.
1. Бўри эртакда қандай тасвирланган? У ҳақида қандай сўзлаш мумкин? (очкўз, бераҳм, ёвуз, қўпол).
2. Бераҳм сўзига қарама-қарши маънодаги сўз топинг (раҳмдил, кўнгилчан, шафқатли).
3. Эчки ҳақида нима дейиш мумкин? (доно, ақлли, қўрқмас, тадбиркор).
4. “Қўрқмас” сўзига яқин сўзлар топинг (ботир, жасур, мард).