ЎҚув методика маркази

Вазифалар:
Машғулот вақтида ҳар бир болани диққат-эътибор билан кузатиб, машқни қандай бажараётганини текшириб туриш.
Кутилаётган натижалар:
Болалар гапиришимиз учун бизга нималар ёрдам беришини (лаблар,тил, тил учи, тил кураги, тилнинг орқа қисми, тишлар, танглай, оғиз, лаблар, тишлар ва тил) билиб оладилар. Тилнинг асосий ҳаракатларини: тилни юқорига кўтариш, пастга тушуриш, тилни оғиз бурчакларига йўналтиришни мустақил бажара оладилар.
Керакли жиҳозлар:
“Қувноқ тилча ҳақида” эртаги билан ишлашни мўлжаллаш.
Машғулотнинг бориши.Тарбиячи: Болалар, қани айтинг-чи: “Биз нимамиз билан гапирамиз?”(оғзимиз билан).Тўғри, оғзимиз билан. Оғзимиз уйчага ўхшайди. Қани эслаб кўринг-чи бу уйчада нима яшайди? Тўғри, тил. Ҳар бир уйнинг эшиги бўлади. Тилча яшайдиган уйчанинг ҳам эшиги бор.Унинг уйчасида битта эшикча эмас, балки иккита эшикча бор. Биринчи эшиги-лаблар, иккинчи эшиги – тишлар. Бу уйнинг шифти ҳам бор. Бу нима деб аталади? Тўғри, танглай. Биз гапирмаганимизда уйчанинг иккала эшикчаси ёпиқ бўлади ва тилча кўринмайди.Ҳаммангиз оғзингизни ёпинг ва бир-бирингизни оғзингизга қаранг. Тилча қоронғида ўтиравериб зерикди. У кўчага чиқиб сайр қилиб келмоқчи бўлди. Аввал тил учини чиқариб, ҳаво қандай эканлигини билиб олмоқчи бўлди. Келинглар, ҳаммамиз шундай қиламиз.(тарбиячи болаларни бу ҳаракатни қандай бажараётганликларини текшириб чиқади). Мана, қандай кенг тилча, ҳаммангиз бир-бирингизга қаранглар. Бирдан қаттиқ шамол эсди, тилча буришди. Ингичка бўлиб олди, сўнгра бутунлай уйчасига яшириниб, ухлаш учун караватчасига чўзилди. (болаларни текшириш).Уйқудан уйғонган тилча машқ қилмоқчи бўлди, юқорига кўтарила бошлади.(юқоридаги тишлар орқасига), сўнгра пастга тушади(пастки тишлар орқасига). (тарбиячи ҳар бир болани текширади). Тилча аввал машқни секин-секин бажаради, сўнгра тез-тез сакрай бошлади. У сакраганда шифтга етай-етай деди, сакраб шифтни тил учи билан силаб қўйди.Тилча машқ қилиб бўлгач, яна кўчага чиқмоқчи бўлди. Кўчага чиқиб зинапояга ўтирди(тилнинг кенг олдинги қиррасини пастги лабга қўйиш, болалар бу ҳаракатни бажараётганларида пастки лабларини қийшайтирмасинлар, пастки тишларга тегизмасинлар). Бир ўзи ўтиравериб зерикди, ўйнаш учун кўчада ҳеч ким йўқ эди. Болалар йўқмикин, деб тилча аввал ўнг томонга, сўнгра чап томонга қаради.Ҳеч бир бола йўқ эди. Болаларни қидириб уйининг атрофида югура бошлади.(тил оғиз атрофида айланма ҳаракат қилади). Бирга ўйнаш учун бола топди-севинганидан сакради, ва тили билан чўлпиллатди.(тилни танглайга ёпиштириб, учи билан чўлпиллатади.Болалар текширилади). Тилча мазза қилиб сайр қилганидан сўнг уйига кетди ва иккала эшикни ёпди. Уйчасининг эшиклари оддий эмас, икки қаватли. Булар-лаблар. Мана юқоригиси, мана пасткиси(кўрсатади) Лаблар ҳам кўп ҳаракат қила оладилар. Мана улар кўп ҳаракат қилиб жилмайишди.Келинглар ҳаммамиз жилмаямиз, сўнгра улар нимагадур аччиқландилар ва олдинга найчага ўхшаб чўзилдилар(текшириш)Сўнгра лаблар бироз очилиб, иккинчи эшикни кўрсатишди. (тарбиячи тишларини кўрсатади).Мана юқориги тишлар, мана бу пастки тишлар.
Ҳамма эшикларни ёпамиз, тилча жуда ҳам чарчади, унинг дам олгиси келяпти.