Умурзоқов, А. Тошбоев

Фаннинг мақсади, вазифаси, предмети, фанлар билан алоқаси ва

усуллари
Бозор иқтисодиёти шароитида халқ хўжалигининг барча тармоқлари бир–бирлари билан узвий боғланган ҳолатда фаолият кўрсатади. Тармоқни ривожлантириш ҳукумат томонидан қабул қилинган қонунлар ва иқтисодий ислоҳотлардан кенг фойдаланишни тақозо этади. Шу мақсадда “Фермер хўжалигини ташкил этиш ва унинг иқтисоди” фани аграр соҳани ривожлантиришда самарали хизмат қилади. Бу фан иқтисодий фан бўлиб, фермер хўжалигида маҳсулот ишлаб чиқаришни кўпайтиришнинг самарали йўллари, ишлаб чиқариш муносабатлари, ишлаб чиқарувчи кучлар; объектив иқтисодий қонунларни амалиётга татбиқ қилиш; хўжаликни бизнес режа асосида юритиш; фермер хўжалигига раҳбарлик қилиш; ишлаб чиқаришга фан-техника янгиликларини ва илғор тажрибаларни жорий этиш; пул-кредит муносабатлари; арзон ва сифатли маҳсулот ишлаб чиқариш йўлларини кўрсатади.
«Фермер хўжалиги иқтисодиёти» фани қуйидаги иқтисодий фанлар «Иқтисодий география», «Қишлоқ хўжалиги иқтисоди», «Бизнес режа», «Тадбиркорлик», «Иқтисодий статистика», «Менежмент», «Маркетинг», «Бухгалтерия ҳисоби ва аудит», «Техника иқтисодиёти» ва бошқа фанлар билан узвий алоқададир.
«Фермер хўжалиги иқтисодиёти» фани қишлоқ хўжалик маҳсулотларини етиштирувчи фермер хўжаликлари тўғрисида қабул қилинган иқтисодий қонунларни ишлаб чиқаришга татбиқ қилиш ва маҳсулот етиштиришдан иборатдир.
Фаннинг предмети – фермер хўжалигини ташкил этишнинг ҳуқуқий-иқтисодий асосини, ишлаб чиқариш фаолияти ва унга хизмат қилувчи инфратузилма, иқтисодий қонунларни татбиқ қилиш, моддий таъминот ва корхоналар ўртасидаги иқтисодий муносабатлари, ишлаб чиқариш кучлари, ишлаб чиқариш муносабатлари ва иш юритишда меҳнат унумдорлигини оширишни ўрганишдан иборатдир. «Фермер хўжалиги иқтисодиёти» фани қишлоқ хўжалигидаги иқтисодий самарадорликни, қонунлар ўзгаришини ва жамият ривожланишини ўрганиб синтез қилиб туради. Фермер хўжалиги тўғрисидаги иқтисодий қонунлар хўжаликни ижобий ривожлантириш учун хизмат қилади.