Turizm va mehmonxona xo’jaligi” kafedrasi o’zbekiston iqtisodiyoti fani bo’yichA

24.3. Aholining iste’mol darajasi ko‘rsatkichlari
Iste’mol xarajatlarining hajmi va tarkibi ko‘p jihatdan aholining asosiy oziq-ovqat mahsulotlarini xarid qilish imkoniyatlari va mazkur mahsulotlarning narxi bilan chambarchas bog‘liq. Aholining oziq-ovqat mahsulotlari iste’moli va uzoq muddatli foydalaniladigan mahsulotlar bilan ta’minlanishi turmush sifatining o‘zgarishini aks ettiradi.

O‘zbekistonda 2000  – 2016-yillar mobaynida aholi jon boshiga to‘g‘ri keladigan go‘sht va go‘sht mahsulotlari iste‘moli 1,3 marta, sut mahsulotlari 1,7 marta, tuxum 4,5 marta, sabzavot va polizlar 2,2 marta, kartoshka 1,6 marta, shakar va qandolat mahsulotlari 2 marta, meva va rezavorlar 3,5 marta, o‘simlik yog‘i esa 2 martaga oshgan. Ayni vaqtda iste’mol tarkibi ancha sifatli oziq-ovqat mahsulotlarini ko‘proq iste’mol qilish hisobidan o‘zgarmoqda. Bunda uglevodlarga boy oziq-ovqatlarni (birinchi navbatda, non va non mahsulotlarini) iste’mol qilishning barqarorlashgani muhim ahamiyat kasb etmoqda.

Mustaqillik yillarida aholi tomonidan iste’mol qilinayotgan oziq-ovqat mahsulotlarining soni, turi o‘nlab barobar oshdi. Hozirgi vaqtda aholining barcha asosiy iste’mol mahsulotlari bo‘yicha (shakardan tashqari) ehtiyoji mahalliy ishlab chiqaruvchilar tomonidan deyarli to‘liq ta’minlanmoqda. Iste’mol mahsulotlari ishlab chiqarish, asosan 2000-yildan so‘ng, mamlakatimizda ularni ishlab chiqarishni rag‘batlantiradigan shart-sharoitlar bosqichma-bosqich yaratila boshlangandan keyin kuzatildi.