Turizm va mehmonxona xo’jaligi” kafedrasi o’zbekiston iqtisodiyoti fani bo’yichA

16.4. O‘zbekiston iqtisodiyotiga xorijiy

investitsiyalarni jalb etish
Mamlakat iqtisodiyotiga xorijiy investitsiyalarni keng miqyosda jalb etish O‘zbekiston hukumati iqtisodiy siyosatining ustuvor yo‘nalishlaridan hisoblanadi. Iqtisodiyotni tarkibiy jihatdan qayta qurish sharoitida xorijiy investitsiyalar milliy jamg‘armalar imkoniyatlaridan ko‘proq investitsiyalarni amalga oshirish va ishlab chiqarish bazasini yangilashda muhim o‘rin tutadi.

Bundan tashqari, xorijiy investitsiyalar jalb etish orqali texnologik uskunalar, ishlab chiqarishni tashkil etish va boshqarishning zamonaviy usullarini import qilish, jahonda mashhur kompaniyalarning savdo belgilaridan, nau-xaulardan, transmilliy kompaniyalarning mahsulot eksportini kengaytirish uchun jahon bozorlariga kirib borish kanallaridan foydalanish imkoniyati yuzaga keladi. Zamonaviy ishlab chiqarishning mazkur omillari har doim ham jahon bozorlarida sotilmaydi va ko‘pincha xorijiy investitsiyalar kirib kelishi bilan birga o‘zlashtiriladi.

Biznes yuritish uchun qulay muhit, xorijiy investorlar uchun huquqiy kafolatlar va imtiyozlar hamda xorijiy investitsiyalar ishtirokidagi korxonalar faoliyatini rag‘batlantirishning yaxlit tizimi O‘zbekiston iqtisodiyotiga xorijiy investitsiyalar oqimini oshirishga yordam berdi.

So‘nggi yillarda mamlakatimiz iqtisodiyotiga kiritilgan xorijiy investitsiyalar hajmi umuman o‘sish tendensiyasiga ega bo‘lmoqda va 2016-yilda jami 10611,4 mlrd. so‘mlik yoki qariyb 3,6 mlrd. dollarlik xorijiy investitsiyalar jalb etildi.

Shu bilan birga mamlakatimiz iqtisodiyotiga jalb etilayotgan xorijiy investitsiyalar tarkibida jiddiy o‘zgarishlar sodir bo‘ldi. Jumladan, 2000  – 2016-yillarda xorijiy investitsiyalarning jami investitsiyalardagi ulushi 23,2 foizdan 21,3 foizgacha pasaygan bo‘lsa-da, to‘g‘ridan to‘g‘ri xorijiy investitsiyalarning jami investitsiyalardagi ulushi 3,4 foizdan 14,8 foizgacha, jami xorijiy investitsiyalardagi ulushi 14,6 foizdan 69,3 foizgacha o‘sgan.