Turizm va mehmonxona xo’jaligi” kafedrasi o’zbekiston iqtisodiyoti fani bo’yichA

21.4. Kichik biznes va xususiy tadbirkorlik rivojlanishining tendensiyalari
Mamlakatimiz mustaqillikni qo‘lga kiritganidan keyingi davrda iqtisodiy hayotning barcha sohalarida ko‘lami va ahamiyati jihatidan juda katta o‘zgarishlar yuz berdi. Shu yillar davomida respublikamiz xomashyo yetkazib beruvchi haddan ziyod markazlashtirilgan iqtisodiyotdan xususiy mulk yetakchi rol o‘ynaydigan ko‘p ukladli iqtisodiyot sari murakkab, ayni vaqtda g‘oyat muhim qadamni tashladi. Davlatning islohotlar dasturi qisqa muddat ichida makroiqtisodiy vaziyatning barqarorlashuviga, sanoat ishlab chiqarishi hajmining ortishiga, inflyatsiyaning pasayishiga, hayotiy muhim masalalar turlari bo‘yicha iqtisodiy mustaqillikka erishish imkonini berdi.

O‘zbekiston Respublikasida iqtisodiy islohotlarning muhim yo‘nalishlaridan biri iqtisodiyotda xususiy sektorni shakllantirish, mulkdorlar sinfini yaratish, kichik biznes subyektlari rivojlanishini har tomonlama qo‘llab-quvvatlashdir. Bu sohada mamlakatimizda qator ijobiy natijalarga erishildi. Mamlakatimizda biznesni yuritish bilan bog‘liq barcha jarayonlarni yanada erkinlashtirish, soddalashtirish va arzonlashtirish, kichik biznes va xususiy tadbirkorlik subyektlarini moliyaviy qo‘llab-quvvatlash borasida amalga oshirilayotgan chora-tadbirlar natijasida kichik biznesning respublikamiz iqtisodiyotidagi tutgan o‘rni tobora mustahkamlanib bormoqda.