Тошкент давлат иқтисодиёт университети И. Саифназаров, А. Мухтаров, Т. Султонов, Д. Эрназаров Илмий тадқиқот методологияси

Информатика (французча information- ахборот ва automatique-автоматика) –ахборот олиш, унга ишлов бериш, уни сақлаш ва тақдим этиш жараёнларини тадқиқ қилиш, жамият ҳаётининг барча соҳаларида ахборот техникаси ва технологиясини яратиш, амалиётга жорий этиш ва улардан фойдаланиш масалаларини ҳал қилиш билан шуғулланувчи фан-техника фаолиятидир.

Президентимиз ахборот технологиялари соҳасида ҳам қилинадиган ишлар кўплиги, бошқа давлатларга қараганда натижалар пастлигини таъкидлади. Масалан, АКТлари соҳасининг мамлакат ЯИМдаги улуши Жанубий Кореяда 9 фоиз, Японияда 5,5 фоиз, Хитой ва Ҳиндистонда 4,7 фоиз, Ўзбекистонда атиги 2,2 фоизни ташкил этади (“Халқ сўзи”, 2018 йил 10 январь). Буни ахборот коммуникация ривожланиш индекси рейтингидаги 176 мамлакат орасида Ўзбекистон 95-ўринда экани ҳам исботлаб туридти. Интернетдан 20 миллион аҳоли фойдаланади, деган маълумот ҳам нореал, фақат интернетдан “Телеграм”да ёзиш учун фойдаланади ҳолос, МДҲ давлатлари бўйича интернетнинг ўртача тезлиги бизникидан 10 марта юқори. Шу боис 2020 йилгача МДҲ давлатлари даражасига етказиш топширилди. Бугун “Хавфсиз шаҳар” ягона комплексини яратиш дастурига кўра, лойиҳа концепцияси ишлаб чиқилди. Унга кўра, Тошкент шаҳрида 16000 дан ортиқ видеокамералар ўрнатиш, маълумотларни қайта ишлаш маркази ва ситуация марказлари ташкил этилади. “Хавфсиз туризм”, “Хавфсиз ҳудуд”, “112” тизими, олий таълим муассасаларига имтиҳон топшириш жараёнларига видеокузатув киритилмоқда. “2018-2021 йилларда “Электрон ҳукумат” тизимини янада ривожлантириш стратегияси ишлаб чиқилди. Муҳаммад ал-Хоразмий номидаги Тошкент ахборотлар технологияси университетини 3 йил ичида жаҳоннинг энг обрўли 1000 университети сафига киритиш таъминланиши белгиланди.

Ахборотни муҳофаза этиш- ахборот борасидаги хавфсизликка таҳдидларнинг олдини олиш ва уларнинг оқибатларини бартараф этиш чора-тадбирлари.
Ахборот технологияси –бу ахборот танлаш, жамғариш, таҳлил қилиш ва фойдаланувчига етказиб беришга йўналтирилган ҳисоблаш техникаси, электр алоқа, информатика имкониятларининг уйғунлигидир.