Tibbiy buyumlar va uskunalarni dezinfeksiya va sterilizatsiya qilish. Usullari. Vositalari. Tartiblari. Sterillangan tibbiy buyumlar va uskunalarning saqlanish qoidalari. Atamalar va ta’riflar

12. Sterilizatsiya markazida tibbiyot xodimlarining mehnat
sharoitlariga bo‘lgan gigienik talablar
12.1. Sterilizatsiya markazida xodimlarining asosiy funksional, ishlab chiqarish xonalarida va ish joylarida mikroiqlim va havo muhitining me’yoriy parametrlari (havo harorati, namligi va havo harakati tezligi, kimyoviy va bakteriologik ko‘rsatkichlari), shuningdek havo almashinuvi me’yorlariga rioya etilgan bo‘lishi kerak.
12.2. Uskunalarni joylashtirish va ularni ekspluatatsiya qilish texnika xavfsizligi va mehnatni muhofaza qilish qoidalariga muvofiq holda amalga oshirilishi kerak.
12.3. Sterilizatsiya markazida ishlaydigan tibbiy va boshqa xodimlar amaldagi me’yoriy hujjat talablariga muvofiq ishga kirishdan oldin dastlabki va davriy tibbiy ko‘rikdan o‘tishi kerak.
13. Sterilizatsiya markazi xonalari, uskunalari va
inventarlarga bo‘lgan talablar
13.1. Sterilizatsiya markazi barcha xonalari, asbob-uskunalar, tibbiy va boshqa inventar saqlanishi kerak. Xonalarda namli tozalash (pollarni yuvish, mebel, uskunalar, deraza tokchalari, eshiklar va h.k.larni artish) bir kunda kamida 3 marta, shundan 1 marta dezinfeksiyalovchi vositalari yordamida o‘tkazilishi kerak. Zarurat bo‘lganda, joriy tozalov ishlari tez-tez o‘tkazilishi mumkin.
13.2. Xonalarni namli usulda tozalash va dezinfeksiya ishlari O‘zbekiston Respublikasida ishlatishga ruxsat etilgan yuvuvchi va dezinfeksiyalovchi vositalar yordamida o‘tkaziladi.
13.3. Barcha yig‘ishtirish vositalari (chelaklar, lattalar, shvabralar va boshqalar) xonalarni va tozalash ishlari turlarini ko‘rsatgan holda aniq markirovka qilingan va shu maqsadda foydalanilishi va alohida saqlanishi lozim. Lattalar toza va quruq holda saqlanadi.
13.4. Xonalarni mukammal tozalov ishlari tasdiqlangan jadval asosida har haftada kamida 1 marta o‘tkaziladi, bunda devorlar, pol, barcha uskunalar yaxshilab yuviladi, mebel, chiroqlar, jalyuzi va hokazolar changlardan tozalanadi.
13.5. Sterilizatsiya markazida yuvuvchi va dezinfeksiyalovchi vositalarining 3 oylik zaxirasi saqlanishi lozim. Yo‘laklar, hojatxonalar va tibbiy-texnik jarayon bilan bog‘liq boshqa yordamchi xonalarda chiqindi yig‘ish uchun pedalli konteynerlar bilan ta’minlangan bo‘lishi kerak.
13.6. Binolar va xonalarni yaroqsiz holga kelgan yoki eskirgan muhandislik uskunalarini, isitish, ventilyatsiya tizimlarini, kanalizatsiya-suv quvuri tarmoqlarini, sanitariya-texnik uskunalar va qurilmalarni, elektr tarmoqlari va hokazolarni almashtirgan holda kapital ta’mirlash ularning sanitariya-texnik holatidan kelib chiqqan holda o‘tkaziladi, zarur holatlarda kapital ta’mirlash ishlari rekonstruksiya bilan birgalikda olib borilishi mumkin.