Tibbiy buyumlar va uskunalarni dezinfeksiya va sterilizatsiya qilish. Usullari. Vositalari. Tartiblari. Sterillangan tibbiy buyumlar va uskunalarning saqlanish qoidalari. Atamalar va ta’riflar

8. Tibbiy asbob-anjomlar va buyumlarni sterilizatsiya
qilishga bo‘lgan talablar
8.1. Tibbiy asbob-anjomlar va buyumlarni sterilizatsiya markazi barcha turdagi tibbiy asbob-anjomlar, jumladan ham issiqqa chidamli, ham termolabil tibbiy buyumlar va materiallarni sterilizatsiyasini ta’minlashi kerak. Bundan kelib chiqqan holda sterilizatsiya ishlari termik va kimyoviy (sovuq) usullarga ajratiladi.
8.1.1. Termik sterilizatsiya
8.1.2. Termik sterilizatsiya ishlari bug‘ yordamida olib boriladi.
8.1.3. Bug‘ bilan sterilizatsiya qilishning asosiy sifat mezonlaridan biri sterilizatsion kamera va tibbiy asbob-anjomlar va buyumlardagi kanallari hamda bo‘shliqlardagi havoni to‘liq chiqarishdir.
8.1.4. Tibbiy asbob-anjomlar va buyumlarni sterilizatsiya qilishda faqat zamonaviy forvakuumli sterilizatorlaridan foydalaniladi. Forvakuum usulida havo nafaqat kamera bo‘shliqlaridan, balki teshikli materiallardan (choyshab va bog‘lov materiallaridan), shuningdek tibbiy buyumlar bo‘shliqlari va kanallaridan pulsatsiyalovchi vakuum yordamida bug‘ yuborish va hosil bo‘lgan bug‘-havo aralashmani vakuum darajasigacha yo‘qotish orqali butunlay chiqarib tashlanadi.
8.1.5. Sterilizator markasini tanlashda quyidagilarga e’tibor qilinishi kerak:
- sterilizatsiyaning kritik parametrlariga: harorat, vakuum chuqurligi, bug‘ning bosimi, ekspozitsiya, sterilizatsiya sikli davomida bug‘ kamerasidan kondensatni operativ ravishda chiqarib tashlashni ta’minlashda xatolarni blokirovka qiladigan avtomatika mavjudligi;
- sterilizator ishi sifatini tekshirish rejimlari: kamera germetikligi bo‘yicha vakuum-test hamda sterillash kamerasidan havoning yaxshi chiqarilganligi bo‘yicha Bovi-Dik testi;
- sterilizatsiya qilinadigan buyumlar va materiallarni yuklash va tushirishning mexanizatsiyalanganligi;
- kamera eshiklarining avtomatik yopilishi;
- sterilizatorni lokal kompyuter tarmog‘i bilan bog‘lash imkoniyati;
- sterilizatsiya siklini avtomatik qayd qilish va printerda qog‘ozga chiqarish imkoniyati;
- sterillash sikli vaqtida yuzaga kelgan xatolar kodini sterilizator paneli displeyiga chiqarish va qayd etish, ularni printerda qog‘ozga tushirish mumkinligi;
- sterilizatsiya jarayonini validatsiya qilish imkoniyati.