Tibbiy buyumlar va uskunalarni dezinfeksiya va sterilizatsiya qilish. Usullari. Vositalari. Tartiblari. Sterillangan tibbiy buyumlar va uskunalarning saqlanish qoidalari. Atamalar va ta’riflar

9. Bug‘li sterilizatorlarni (avtoklav) o‘rnatish uchun xonalarga
bo‘lgan talablar
9.1. Bug‘li sterilizatorlar ushbu xonalarga qo‘yiladigan asosiy talablarga (yerga ulangan, elektrenergiya, suv va kanalizatsiya tizimiga ulangan) rioya etilishi lozim.
9.2. Bug‘li sterilizatorlarni o‘rnatishda ishlab chiqaruvchining talablari hisobga olinishi kerak.
9.3. Bug‘li sterilizatorlar o‘rnatiladigan hamma xonalar tabiiy va sun’iy yoritilgan, derazalarda framuga yoki fortochkalar, kiruvchi-so‘ruvchi ventilyatsiya bo‘lishi lozim.
9.4. Bug‘li sterilizatorlar o‘rnatilgan xona eshiklari tashqariga ochiladigan bo‘lishi hamda hattoki bug‘li sterilizatorlardan faqat bittasi ishlagan paytda ham yopilmasligi kerak. Eshiklar oynali bo‘lmasligi kerak.
9.5. Tayanch yuza tekis, gorizontal bo‘yicha to‘g‘rilab olingan bo‘lishi kerak. Pol suv o‘tkazmaydigan qattiq materialdan (plitka, beton, qattiq quyma material va h.k.) ishlangan bo‘lishi lozim.
9.6. Xonalar devorlari, shipi, pol qoplamasi va bo‘yog‘i sanitariya tozalov ishlariga chidamli bo‘lishi va bunda yoqimsiz hidlar hamda toksik moddalar chiqarmasligi kerak.
9.7. Elektr simlarini o‘tkazish amaldagi qoidalarga muvofiq bajarilishi kerak. Yuqori darajali himoyani ta’minlash uchun himoya simini ulash (o‘zaro ulash)ga apparat korpusining quyi qismidagi himoya qisqichi xizmat qiladi. (biriktiruvchi qutidan himoya simi uchun qisqich yonida). Apparatning oldida, unga bevosita yaqin joyda, xizmat ko‘rsatuvchi xodimlarga monelik qilmaydigan tarzda, uch fazali asosiy o‘chiruvchi o‘rnatilgan bo‘lishi, u “o‘chirilgan”, “yoqilgan” holatlari aniq ko‘rsatilgan tarzda qurilmaning ajratuvchi elementi sifatida qayd etilishi lozim.
9.8. Barcha bug‘li sterilizatorlar ekspluatatsiya hujjatlari (pasport)ga muvofiq yerga ulangan bo‘lishi kerak. Yerga ulovchi o‘tkazgichlar sifatida suv quvurlaridan, markaziy isitish tarmoqlaridan, yonuvchi va portlovchi aralashmalar uchun quvurlardan foydalanish ta’qiqlanadi.
9.9. Sterilizator faqat vakolatli shaxs tomonidan o‘rnatilishi va foydalanishga topshirilishi kerak.