Tibbiy buyumlar va uskunalarni dezinfeksiya va sterilizatsiya qilish. Usullari. Vositalari. Tartiblari. Sterillangan tibbiy buyumlar va uskunalarning saqlanish qoidalari. Atamalar va ta’riflar

7.4. Tibbiy asbob-anjomlarni ultratovush bilan tozalash va dezinfeksiya qilish
7.4.1. Ultratovushli ishlov berish zanglamaydigan po‘latdan va qattiq plastmassadan ishlangan tibbiy asbob-anjomlarni (elastomerlardan tashqari) qo‘shimcha tozalash uchun maxsus mo‘ljallangan.
7.4.2. Mexanik ta’sirga chidamsiz asboblar (mikroxirurgik, stomatologik asboblar) uchun, ultratovush yordamida ishlov berish bir vaqtning o‘zida puxta tozalash va dezinfeksiyalash imkonini beradi.
7.4.3. Ultratovush yordamida tozalash quyidagi holatlarda qo‘llaniladi: - qo‘lda tozalash jarayonlariga qo‘shimcha ravishda samarali mexanik tozalash usuli sifatida;
- tozalanishi qiyin bo‘lgan ifloslanishlarni bartaraf etish uchun;
- mashinada tozalash usulining tarkibiy qismi sifatida qo‘shimcha tozalash uchun.
7.4.4. Ultratovushli tozalashdan optimal foydalanish uchun quyidagi talablar bajarilishi kerak:
- ultratovush vanna yo‘riqnomalariga muvofiq to‘ldirilishi kerak;
- suvga tibbiy asbob-anjomlarni yuvish va zararsizlantirish qilishga muvofiq keladigan yuvuvchi yoki yuvuvchi-dezinfeksiyalovchi vositasidan foydalanish;
- ultratovushli zararsizlantirishda yuvuvchi va dezinfeksiya qiluvchi vositalar konsentratsiyasi, harorati va ekspozitsiyasi ishlab chiqaruvchining ko‘rsatmalarigsha rioya qilinishi kerak;
- ultratovush vanna xona haroratidagi suv bilan to‘ldirilishi kerak;
- ultratovushli tozalashda ishlatilayotgan suvning harorati +45 °C dan yuqori bo‘lsa oqsillar denaturatsiyasi tufayli tibbiy asbob-anjomlar yuzasida qatlamlar hosil bo‘lishi mumkin.
7.4.5. To‘g‘ri tayyorlangan vannadan tashqari, quyidagi asosiy qoidalarga ham rioya etilishi lozim:
- tibbiy asbob-anjomlar suyuqlikka to‘liq bo‘ktirilgan bo‘lishi kerak;
- sharnirli tibbiy asbob-anjomlar va buyumlar tozalash jarayonida, yuzalarning yopilib qolishini kamaytirish uchun ochilgan holda bo‘lishi kerak;
- tibbiy asbob-anjomlar ustma-ust emas, balki yonma-yon taxlangan bo‘lishi kerak;
- tibbiy asbob-anjomlar ultratovushli tozalash jarayoniga to‘sqinlik qilmaydigan to‘rsimon lotoklarga (sim to‘rli lotoklar yoki teshikli listdan tayyorlangan lotoklarga) joylashtirilishi kerak;
- maydoni bo‘yicha katta detallar ultratovush vannalariga akustik soya va zonalar hosil qilmaydigan tarzda joylashtirilishi kerak.
7.4.6. Ultratovushli vanna ichidagi suyuqlik har kuni almashtirilishi kerak.
7.4.7. Dezinfeksiyalovchi vosita eritmasidan ishlab chiqaruvchi yo‘riqnomasiga asosan uzoq vaqt foydalanilish mumkin.
7.4.8. Ultratovushli tozalash samaradorligining pasayishi va yuqori darajadagi ifloslanishga oldini olish uchun dezinfeksiya vositalarining ishchi eritmalari mazkur preparat yo‘riqnomasiga muvofiq tayyorlanadi.