Тиббий биология ва генетика Тиббиёт олийгохи талабалари учун дарслик

РНКнинг тузилиши.РНК – рибонуклеин кислота ДНК молекуласидан фарқли равишда, кичик ўлчамли битта занжирдан иборат полимердир. РНКнинг мономери ҳам нуклеотидлар ҳисобланади ва у қанд – рибозадан, фосфат кислота қолдиғи ва тўртта асосларнинг биридан ташкил топган. Азотли асослардан учтаси ДНКдаги каби аденин, гуанин, цитозин тўртинчиси урацил хисобланади.
РНК полимерининг ҳосил бўлиши худди ДНКдаги каби кечади, қўшни нуклеотидларнинг рибоза ва фосфат кислота қолдиғи ўртасида ковалент боғлар ҳосил бўлади. РНК молекуласи ўзида 75 дан 10000 тагача нуклеотидлар сақлайди. Ўзининг тузилиши, молекулаларининг катталиги, ҳужайрада жойлашувчи ва бажарадиган функциясига кўра РНКнинг учта асосий типи: рибосомали РНК(рРНК), транспорт РНК(тРНК) ва ахборот РНК(аРНК) тафовут қилади.
Рибосомал РНК (рРНК) – асосан ядрочада синтезланади ва ҳужайрада барча РНКнинг 85%га яқнини ташкил қилади. Улар рибосома таркибига кириб рибосоманинг оқсил биосинтези жараёникечадиган фаол марказининг шаклланишида иштирок этади. Нуклеотидлар тилидан аминокислоталар тилига ахборотлар трансляциясини таъминловчи аРНК ва тРНКнинг ўзаро таъсири жараёни рибосомаларда амалга ошади, булар рРНК ва хилма – хил оқсилларнинг мураккаб комплекси бўлиб юзага чиқади. Рибосомал РНК рибосомаларнинг фақат структура компоненти бўлибгина қолмасдан, балки уларни аРНКнинг маълум бир нуклеотидлар кетма кетлиги билан боғланишини таъминлайди. Бу билан пептид занжири ҳосил бўлишнинг бошланишини ва чегарасини белгиланади. Бундан ташқари улар рибосома ва тРНКнинг ўзаро таъсирини таъминлайди. Рибосома таркибига кирувчи оқсиллар рРНК билан биргаликда ҳам структуравий ҳам ферментатив ўрин бажаради.
Про ва эукариот ҳужайралари рибосомаларининг тузилиши ва функцияси жуда ўхшаш, улар катта ва кичик субзаррачалардан иборат. Эукариотларда кичик заррача таркиби бир молекула рРНК ва 33 молекула хилма – хил оқсиллардан иборат, катта субзаррача эса уч молекула рРНК ва 40га яқин оқсилларни жойлайди. Прокариотлар митохондрий ва пластиданинг рибосомалари ўзларда кам компонентларни тутадилар.