Texnologik jihozlar va ularning ekspluatatsiyasi

2. Avtomobillarni yuvishdan tushgan suvdan qayta foydalanish va ularga qo’yiladigan ekologik talablar
Avtomobil, agregat va detallar yuvilganda ishlatilgan suvlar kir, moy, va neft mahsulotlarining qoldiqlarini yuvib tushgani sababli ifloslangan bo’ladi.

2.13-rasm. Yopiq siklli suv tozalash inshoati

Ekologik talablarga asosan, ishlatilgan suvlar shahar oqova suvlar tizimiga to’g’ridan - to’g’ri quyilmasligi zarur. Shu sababli avtotransport korxonalari ishlatilgan suvlarni tozalash uchun loytindirgich va moybenzintutgich bilan jihozlanadi.
Avtomobillarni qo’l bilan shlanga yordamida yuvishda, ayniqsa, ko’p miqdorda suv sarflanadi. Suv sarfini kamaytirish va atrof - muhitni muxofaza qilish uchun ishlatilgan suvni tozalab, undan qayta foydalanish mumkin.
Avtoservis korxonalari uchun yopiq siklli FFU-1, FFU-2, FFU-6, FFU-10, Monoblok-1 va Monoblok-2 kabi suv tozalash inshootlari (2.13-rasm) yaratilgan.
Qurilmaning ishlash tamoyili quyidagicha: avtomobilga nasos yordamida yuqori bosimda sepilgan suv kuzovning kirlarini yuvib polga tushadi; loyqa suv poldagi qiya ishlangan ariqchalar yordamida loytindirgichga quyiladi; loytindirgichda loyiqa suvning katta zarrachalari cho’kindi hosil qiladi; loytindirgichning ustki qismidan tindirilgan suv moybenzintutgichga o’tadi va sig’imning yuqori qismida neft mahsulotlari yig’iladi; nisbatan tozalangan suv sig’imning pastki qismidan FFU qurilmasiga so’rib olinadi; suv tarkibidagi mayda zarrachalar markazdan qochma kuch yordamida, tarkibi esa, kimyoviy usulda tozalanadi va qayta foydalanish uchun toza suv bakiga quyiladi.

2.14-rasm. UKO-5k turidagi suv tozalash moslamasi: suvni tozalash tezligi 5 m^3/soat, moslamadagi toza suvni saqlash bakining hajmi 1000 l, elektr toki kuchlanishi 380/50 kVt, avtomatlashgan holda filtr yuviladi. Bu moslama filtrini yuvish avtomat tarzda “Yuvish” tugmachasini bosish bilan amalga oshiriladi.

Avtomobillarni kichik yuvish shaxobchalarida ishlatilgan suvni tozalash uchun UKO-5k turidagi suv tozalash moslamalaridan foydalaniladi (2.14-rasm).