Тема: Анатомия панинин классификациясы рауажланыу тарийхы хам уйрениу методы

Uzınsha miydiń ishki dúzilisi

Uzınsha miydiń ishki dúzilisin kóriw ushın onı tómengi oliva ortasınan kesesine kesiw kerek. Uzınsha miydiń ishinde kúl reń zattıń, teńsalmaqlıqtı, háreketti tártipke salıp turıwǵa hám zat almasıwǵa tiyisli bolǵan ózekleri jaylasqan.
Eger uzınsha miy til astı nervleri turǵan jerden kesilse, uzınsha miydiń til astı nervleriniń talaları járdeminde úsh bólekke, yaǵnıy arqa hám eki qaptal bóleklerge bólingenin kóriw múmkin, qaptal bólekler óz náwbetinde adasqan nerv talaları járdeminde jáne eki bólekke-orta hám aldınǵı bóleklerge ajıratıladı.
Uzınsha miydiń jartısın aldınǵı tárepten arqaǵa qarap kózden keshirilse, tómendegilerdi kóriw múmkin; arqa bólekte, piramidanıń arqasında ishki dásteniń talalarınıń kesispesi jaylasqan, onnan arqada orta boylama dáste ornalasqan. Bul dástelerdiń arqaraq qaptal tárepinde yaǵnıy romb tárizli shuqırdıń túbine jaqın til astı nerviniń ózegi jaylasqan bolıp, onıń taları uzınsha miy aq zatın qıyalama kesip ótedi.
Til astı nerv talaları menen adasqan nerv talaları arasındaǵı aldınǵı júzege jaqın bólimde sırtqı sheńber tárizli talalar hám kóriw bórtigi menen oliva jolı jaylasqan. Onnan sál arqaraqta til astı nervi talalarınan sırtqı tárepte olivanıń tisli
ózegi turadı. Bul ózekten arqaraqta tor qabat jaylasqan. Bul qabat nerv talaları hám olardıń arasındaǵı nerv kletkalarınan payda bolǵan. Tor qabat arqa miydegi usınday qabat penen birlesip, háreketlerdiń názikligin táminlewshi úlken reflektor jollardı quraydı. Olivanıń tisli ózeginen arqa qaptal tárepte eki nervke baylanıslı ózek turadı. Til astı nerv ózeginiń sırtqı tárepinde romb tárizli shuqır túbine jaqın jerde kúlreń qanat ózegi jaylasqan.
Joqarıda sanap ótilgen úsh ózek yaǵnıy olivanıń tisli ózegi, eki nervke baylanıslı ózek, kúlreń qanat ózeklerin, adasqan nervtiń talaları qaptal bólekten ajıratıp turadı.
Aldınǵı bólekte, adasqan nerv talalarınan sırtqı tárepte úsh shaqlı nervtiń arqa miy tárepke ketken jolınıń ózegi jaylasqan, onnan arqaraqta hám ishkerirekte sına tárizli dizimshe ózegi hám onıń sırtqı tárepinde bolsa shılbır tárizli dene turadı.
Uzınsha miydiń aq zatı uzın hám qısqa ótkiziwshi jollarınan ibarat. Uzın talalar bas yaki arqa miyden kelip, uzınsha miy arqalı ótip ketetuǵın talalar bolıp, olar, eki sistemanıń talaları usı uzınsha miy ishinde kesisedi.
Uzınsha miydiń qısqa talalarına bolsa, usı miydiń óz ishindegi ózeklerdi bir - biri menen, hám bas miydiń uzınsha miy qasındaǵı basqa bólimleri menen biriktiriwshi talaları jatadı. Oliva menen miyshe arasındaǵı talalar, hám ortadaǵı uzınına ketken dáste talaları usılardan esaplanadı.