Тема: Анатомия панинин классификациясы рауажланыу тарийхы хам уйрениу методы

Artqı miy- metencephalon

Artqı miy eki bólimnen: aldınǵı tárepinen - Varoliy kópiri, arqa tárepinen - miysheden ibarat.
Kópir–pons varolii. Miydiń bul bólimi adamda ádewir jaqsı rawajlanǵan, ol kese jaylasqan talalar menen qaplanǵan hám aldınǵı - tómengi tárepke ádewir bórtip shıqqan kópir formada miy túbiniń, arqa bóliminde jaylasqan. Onıń aldınǵı sheti miy ayaqshaları, arqa sheti bolsa uzınsha miydiń aldınǵı ushı menen shegaralanǵan. Kópirdi aldındaǵı, ásirese, arqadaǵı qońsı organlardan shuqır jaylasqan kese jarıqlar ajıratıp turadı. Arqadaǵı kese jarıqtan, ishkeriden sırtqa
qaray sanaǵanda, uzaqlastırıwshı nerv, júz (bet) nervi, hám dáliz - ulitka nervi shıǵadı.
Kópir aldınǵı tárepke pás gúmbez taqılette kóterilip shıqqan bolsa, onıń ortasında aldınan arqaǵa qaray ketken keń qarıq bar. Kópirdiń eki qaptal tárepindegi kese talaların jarıp úsh shaqlı nerv shıǵadı. Kópirdiń talaların jarıp shıqqan nerv úsh shaqlı nervtiń seziwshi bólimi yaki úlken bólegi esaplanadı. Bul nervtiń háreketlendiriwshi talalardan ibarat kishi bólegi, úlken bólekten biraz aldınıraqtan shıǵadı.
Kópirdiń arqa tárepi IV qarınsha ishine kirgen bolsa, usı qarınsha túbin yaǵnıy romb tárizli shuqırdı payda etiwde qatnasadı.

Kópirdiń ishki dúzilisi

Kópirdi ortasınan kesesine kesip kórilgende: úlken aldınǵı bólimnen hám kishi arqa bólimnen ibarat ekenligi belgili. Hár-bir bólimdi bir - birinen ajıratıp turıwshı shegara trapetsiya tárizli dene esaplanadı. Bul deneniń qaptal tárepinde, hám joqarıraǵında úlken yadrolardan biri esaplanǵan ústingi oliva turadı.
Trapetsiya tárizli dene menen ústingi olivaga esitiw jollarına tiyisli. Trapetsiya tárizli dene ústinde, ústingi olivaǵa jaqın jerde, seziwshi talalardan dúzilgen ádewir juwan ishki dáste jaylasqan.
Kópirdiń tiykarǵı bólimi júdá kóp muǵdarda uzınına hám kesesine ketken talalardan ibarat bolıp, bul talalar arasında kópirdiń ózine tán ózekleri jaylasqan.
Uzınına (yaǵnıy aldınan arqa tárepke) ketken talalar tiykarınan piramida jollarına, qabıq-kópir jollarına tiyisli bolıp, bul joldıń talaları kópirdiń ózine tán ózekleri menen baylanısqan. Bul ózeklerden baslanǵan kese talalar miy qabıǵına baradı, yaǵnıy usı jollar járdeminde bas miy qabıǵı Varoliy kópiri arqalı miyshe qabıǵı menen baylanısadı.
Kópirdiń arqa bóliminde tor qabat tarqalǵan bolıp, ol uzınsha miydegi usınday tor farmatsiyanıń aynımaǵan dawamı.