Tarix kafedrasi

Harbiy xalq boshqaruvi – mustamlaka davri Toshkentdagi boshqaruv tizimi. 1868 yil 27 fevralda Toshkentning “Yangi shahar” qismida harbiy xalq boshqaruvi tuzilib, statistik maslahatchi Rossiskiy uning boshlig‘i etib tayinlangan. Ushbu boshqarmaning dastlabki qaroriga ko‘ra, Toshkentning «Yangi shahar» qismida reja tuzish, uylar qurilishi, ko‘cha va maydonlar barpo etish, soliqlarni tartibga solish, daromad va xarajatlar smetasini tuzish, irrigatsiya tizimi va obodonlashtirish ishlarini amalga oshirish ko‘zda tutilgan.

Xonliklar – XVIII asr boshlari, XIX asr oxiri va XX asr boshlarga qadar O‘rta Osiyoda mavjud bo‘lgan Buxoro amirligi, Xiva xonligi va Qo‘qon xonligi davlatlariga nisbatan ishlatiladigan umumiy atama. Xiva va Qo‘qon xonliklarini xon unvonidagi hukmdor, Buxoro amirligini esa amir idora qilgan. Ularningsh boshqaruv tizimi bir-biridan farq qiluvchi ayrim unvonlar va mansablarni hisobga olmaganda tarkibiy tuzilishi bir-biriga o‘xshashligi bilan izohlanadi. Ilmiy adabiyotlarda yuqoridagi davlat birlashmalarini umumiy tarzda xonliklar, ular mavjud bo‘lgan davrni esa, xonliklar davri deb atash qabul qilingan.

Fon Kaufman – nemis dvoryanlaridan chiqqan general. Rossiya imperiyasi ma’muriyatining sodiq va ishonchli xizmatkorlaridan biri. Barcha lavozimlarda podsho siyosatini ko‘ngildagidek amalga oshirgan shaxs. 1868-1876 yillarda Turkistondagi harbiy yurishlarda istilochi sifatida tanilgan. 1867-1882 yillarda Turkiston general-gubernatori. Turkistonda general-gubernatorlik boshqaruvi Kaufmanning cheklanmagan istibdosi asosida amalga oshirilgan.

Chernyaev – rus harbiylari orasida cho‘rtkesarligi va o‘ta jangarligi bilan mashhur bo‘lgan. Mahalliy aholiga nisbatan o‘ta salbiy munosabatda bo‘lgan shafqatsiz polkovnik Chernyaev 1864 yilda Avliyo ota shahrini egallagani uchun general-mayor unvonini olgan. U 1865-1866 yillarda Turkiston viloyat harbiy gubernatori, 1882-1884 yillarda Turkiston o‘lkasi general-gubernatori bo‘lgan.