Таълим вазирлиги самарқанд иқтисодиёт ва сервис институти

15.3. Иш ҳужжатлари билан ишлаш учун вақт ажратиш
Маъмурий менежментда ходимлар меҳнатини ташкил қилишга, вақтни режалаштиришга кўп жиҳатдан боғлиқ.
Вақтни бошқариш қўл остидаги кишилар билан зарур мулоқотни ташкил қилиш ахборот ва ҳужжатлар билан ишлай билиш раҳбар ходим фаолиятини аниқ ташкил этилишининг муҳим соҳасидир.
Йиллик, чораклик, ойлик ва ҳафталик иш режаларини тўғри ишлаб чиқиш раҳбарнинг иш вақтини мақсадга мувофиқ тақсимлаш имконини яратади. Турли даражадаги раҳбарларнинг иш режалари олдиндан келишиб олинган ҳолда тузилган бўлиши лозим. Бунда, биринчи навбатда, энг юқори лавозимли раҳбарларнинг иш режаси ишлаб чиқилиши зарур.
Маъмурий ходим ва раҳбарнинг иш вақти қандай мақсадларга сарфланаётганини вақти-вақти билан таҳлил қилиб турилса, ўз самарасини кўрсатади. Шундай таҳлил асосида ишларнинг мавзулари ишлаб чиқилади ҳамда уларни бажаришга сарфланадиган вақтнинг тахминий меъёрлари белгиланади.
Маъмурий менежментда иш ҳужжатлари билан ишлашни ташкил қилиш учун вақт ажратишни бошқариш муҳим аҳамиятга эга. Раҳбар ва унинг муовинларининг асосий вақти иш ҳужжатлари билан ишлашга сарфланади.
Шу сабабли улар билан самарали ишлашни йўлга қуйиш, вақтни тежашда муҳим аҳамиятга эга. Иш ҳужжатлари билан танишиши, тегишли тадбирлар ишлаб чиқишда, маъмурият ходимлари техник воситалардан, ЭҲМ лардан фойдалансалар мақсадга мувофиқ бўлади.
Ҳужжатлар келиши билан раҳбарга киритиш, тегишли ижрочиларга йўналтириш ва бажарилиши учун аниқ муддатлар белгилаш зарур.
Маъмурий менежментда ўз ишини режалаштириш услубларини ўрганиш катта аҳамият касб этади. Бунда ўз ишини режалаштириш, фаолият йўналишини тузиш, компьютер ёрдамида иш вақтини тартибга солиш ва шу каби усуллардан фойдаланиш мақсадга мувофиқдир.


Таянч иборалар: вақт ресурси, вақтни бошқариш, маъмурият ходимларининг йиллик иш режаси, ойлик иш режаси, ҳафталик иш режаси, мутлоқ банд бўлинадиган иш вақти, шартли бандлик вақти, чекланган бўш вақти.
Назорат учун саволлар

1. 
   Иш вақти деганда нима тушунилади?
   
2. 
   Иш вақтига қуйиладиган асосий талаблар нималардан иборат?
   
3. 
   Иш вақти билан боғлиқ қандай режа турлари мавжуд?
   
4. 
   Вақтни бошқаришнинг моҳияти нимадан иборат?
   
5. 
   Иш вақтини гуруҳлаштириш қандай тартибда амалга оширилади?