Шодиев акбар ашурович бухгалтерия ҳисобининг хусусиятлари

Бюджетга тўловлар бўйича бўнакларни ҳисобга олиш.
Бюджетга солиқлар ва мажбурий тўловлар бўйича тўланган бўнаклар қуйидаги ҳисобварақларда акс эттирилади:
4410-«Бюджетга солиқ ва тўловлар бўйича бўнаклар»
Ушбу ҳисобварақда бўнак билан тўланган солиқ суммалари, ҳарид қилинган хом-ашё, материаллар, ярим тайёр маҳсулотлар ва бошқа турдаги ишлаб чиқариш заҳирали бўйича ҳисоблашиш ҳужжатларида кўрсатилган қўшилган қиймат солиғи ҳисобга олинади. «Бюджетга солиқлар ва тўловлар бўйича бўнаклар» ҳисобварағида йиғилган суммалар «Бюджетга тўлов бўйича қарзлар» ҳисобварағининг дебетига ҳисобдан чиқарилади.
Бўнакларни етказиб бериш (тўлаш)да пул маблағларини ҳисобга олувчи ҳисобварақларнинг кредитидан солиқлар ва тўловлар бўйича бўнак тўловларини ҳисобга олувчи ҳисобварақларнинг дебетига ёзувлар амалга оширилади.
Бўнак тўловларининг аналитик ҳисоби ҳар бир бўнак тури бўйича алоҳида юритилади.
Мисол: Ҳарид қилинган моддий бойликлар бўйича қўшилган қиймат солиғининг суммаси акс эттирилади. Ушбу хўжалик муомаласига қуйидагича бухгалтерия ўтказмаси тузилади:
Д-т 4410-«Бюджетга солиқлар ва тўловлар бўйича бўнаклар» ҳисобварағи
К-т 6010-«Мол етказиб берувчилар ва пудратчиларга тўланадиган ҳисобварақлар» ҳисобварағи


ДАВЛАТНИНГ МАқСАДЛИ ФОНДЛАРИГА ВА СУҒУРТА ТЎЛОВЛАРИ БЎЙИЧА ТЎЛАНАДИГАН БЎНАКЛАРНИ ҲИСОБГА ОЛИШ

Ўзбекистон республикаси қонунчилигига мувофиқ ижтимоий суғуртага, мулк суғуртасига оид, шахсий суғуртага оид, нафақа, йўл ва бошқа фондларга доир тўланган бўнак суммаларини ҳисобга олиш қуйидаги ҳисобварақларда амалга оширилади:

4510-«Суғурта бўйича тўланадиган бўнак тўловлари»
4520-«Давлат мақсадли фондларига тўланадиган бўнак тўловлари»
Бўнакларни ўтказишда пул маблағларини ҳисобга олувчи ҳисобварақларнинг кредитидан 4510-«Суғурта бўйича тўланадиган бўнак тўловлари», 4520-«Давлат мустақил фондларига тўланадиган бўнак тўловлари» ҳисобварақларининг дебетида ёзувлар амалга оширилади. Суғурта ҳамда мақсадли фондларга тўловлар бўйича якуний ҳисоблашишлар, 6510-«Суғурта бўйича тўловлар», 6520-«Давлатнинг мақсадли фондларига тўловлар» ҳисобварақларининг дебети, 4510-«Суғурта бўйича тўланадиган бўнаклар тўловлари», 4520-«Давлат мақсадли фондларига тўланадиган бўнак тўловлари» ни ҳисобга олувчи ҳисобварақларнинг кредити бўйича амалга оширилади.
Мисол: Суғурта бўйича бўнак тўловлари ўтказилди.
Ушбу хўжалик муомаласига қуйидагича бухгалтерия ўтказмаси тузилади:

Д-т 4510-«Суғурта бўйича бўнак тўловлари» ҳисобварағи

К-т 5110-«Ҳисоблашиш ҳисобварағи» ҳисобварағи