Самиғов н. А. Бино

Ўта тез қотувчан цемент(ОБТЦ) – таркибидаги алит (С₃S) 65-68%, целит (С₃А) 18%, майдалик даражаси 4000 см²г бўлади. ОБТЦ 1 сут 35%, 3 сут 65% атрофида маркадаги мустаҳкамликка эришади.
Бу турдаги цементлар йирик йиғма темирбетон конструкциялар ишлаб чиқаришга, гидратация пайтида кўп иссиқлик ажратиши эса қишки мавсумда бетон ишларини бажаришга имкон яратади. Лекин иссиқликнинг кўп ажратиши бу цементларни массив конструкцияларда ишлатишда қийинчилик туғдиради. ОБТЦ таркибида С₃А нинг кўп бўлиши сулфоалюминатли коррозия эҳтимоли бор жойларда бетон ишларини олиб боришга имкон бермайди.
Сулфат муҳитига чидамли цемент – таркибида С₃S 50% гача, С₃А 5% гача ва С₃АС₄AF эса 22% гача бўлади. Цементнинг бу тури сулфат кислотаси қолдиқлари бўлиши мумкин бўлган ҳолларда, шўрхоқ ерларда ишлатишга мўлжалланган. С₃А нинг минимал миқдорда бўлиши ундан совуққа чидамлилиги юқори бетон олишда фойдаланилади. Бу цементни олишда, унга гидравлик қўшимчалар қўшилмайди, фақат гипс, пластификаторлар ва гидрофобловчи моддалар киритилиши мумкин.
Минерал қўшимчали цементлар. Актив минерал қўшимчалар (АМҚ) табиий ва сунъий бўлиши мумкин. Табиийларига диатомит, трепел, опока, глиеж, вулқон кули, туф, пемза, трасс ва ш.к., сунъийларига эса донали домна шлаки, куллар, шлам чиқиндилари ва ш.к. лар киради.
Цементга АМҚ ларнинг киритилиши улар таркибидаги актив кремнеземнинг (SiO₂) цемент гидратациясидан ҳосил бўлган Са(ОН)₂ билан реакцияга киришиб, ҳавода ва сувда қотадиган калций гидросиликатларининг ҳосил бўлишига олиб келади. Натижада цемент клинкери тежалиши билан бирга сув ва бошқа агрессив муҳитларга чидамли цементнинг турларини ҳосил қилиш мумкин.
Пуццоланли портландцемент (ППЦ)-клинкер, гипс ва актив минерал қўшимчаларни биргаликда майдалаб туйиб олинади. Бунда чўкинди жинслар (диатомит, опока, трепел)20-30%, вулқондан ҳосил бўлган жинслар (пемза, туф), глиеж ва ѐқилғи куллари 25-40% атрофида клинкер таркибига киритилади.
Актив минерал қўшимчалар таркибидаги актив кремнезем қуйидаги реакцияга биноан Са(ОН)₂ билан бирикади:


mСа(ОН)₂+SiO_2акт+nH₂O=(0,8-15)CaO^.SiO₂^.pH₂O.

Калций гидроксиднинг бириктирилиши цемент тоши биринчи турдаги коррозиясини огоҳлантиради ва мустаҳкамликни оширади. Пуццоланли цемент нормал шароитда оддий цементга нисбатан секин қотади. Бу турдаги цемент асосидаги бетонлар нам ва сувли шароитларда ишлатилганда гидрат бирикмаларидан сувнинг буғланиши ҳисобига киришади ва қисман мустаҳкамлигини йўқотади.