Раќим соли бођдонли

1992-10-06


ЭЪЗОЗ ЭТ, ЭЪЗОЗ

Њзинг атагансан уни дилнавоз,

Бошингга кўтариб юрсанг ҳамки оз,
Олар эдинг қайдан усиз куч, парвоз,
Қолмасин сенда ҳеч бунга эътироз,
Умр йўлдошингни эъзоз эт, эъзоз.

Нозли боқишида бир олам мазмун,

Сен бир кулиб боқсанг, жилмаяр мамнун,
Унутма, ишқида бўлганинг жунун,
Қолмасин сенда ҳеч бунга эътироз,
Умр йўлдошингни эъзоз эт, эъзоз.

Соғ бўлса, кўнглинг тинч ташлайсан қадам,

Йўлингга йўлдошинг – бир умр ҳамдам,
Дард агар ёндашса, арит, қил ёрдам,
Қолмасин сенда ҳеч бунга эътироз,
Умр йўлдошингни эъзоз эт, эъзоз.

Келажагинг – фарзанд, у эса – она,

Ювиб-тарашлайди, улашар жона,
У борки, ёруғдир кулбаи хона,
Қолмасин сенда ҳеч бунга эътироз,
Умр йўлдошингни эъзоз эт, эъзоз.

Толе кулиб боқса, толедошинг – ёр,

Омад юз ўгирса, куч, қўлдошинг – ёр,
Севдинг, турмуш қурдинг, қўлда номус-ор,
Қолмасин сенда ҳеч бунга эътироз,
Умр йўлдошингни эъзоз эт, эъзоз.
Боғдонли борингни бир бор кўз-кўз эт,
Ёр севдинг, ҳамдаминг, тилагингга ет,
Барчаси Оллоҳдан мингбор шукур эт,
Қолмасин сенда ҳеч бунга эътироз,
Умр йўлдошингни эъзоз эт, эъзоз.
2007-08-31


БЕБАҲО БОЙЛИГИМ

Бебаҳо бойлигим – ўзингсан, фарзанд,

Фоний дунёдаги боқий кошонам.
Сен борсан, бўлғуси келажак бунёд,
Ёдингда кезаман, сен билан ҳамдам.

Ҳар биринг умримнинг бир баҳорисан,

Чаманлар кўраман яноғингизда.
Қалбим қувончисан, оҳу-зорисан,
Бир этак набира қароғингизда.

Чаманлар чаманга улангусидур,

Асрлар орзуси қалбимда маёқ.
Чаманлар чечакнинг соф кулгусидур,
Асрдан асрга қўйгуси оёқ.
2006-10-23. Рўза ҳайити.


ОТА ТИЛАГИ
(Қизим Рухсорага)
Фарзандим – бахтимсан ўзинг қизалоқ,
Оталик меҳри-ла ардоқлар эдим.
Уйда кўрганларинг бўлсин бир маёқ,
Мустақил ҳаётга ташладинг одим.

Ўксинма, бизлардан кетдим деб йироқ,

Қизнинг бахти шундай – изтироб, алам.
Изтироб ортида оналик бахти,
Оила – келажак бари мужассам.

Оғайни, дўстлар жам бугун тўйингда,

Борган хонадонинг бахт билан кутсин.
Бахтни етаклаб бор сен ҳам уйингга,
Ишончинг, ҳамдаминг ардоқлаб ўтсин.

Бахтинг қутлаб отанг дер сенга тилак,

Оғир дамда чида, севгинг сўнмасин.
Мустақил яшаш-чун кўп бардош керак,
Мусаффо қалбингга ғубор қўнмасин.