Qarori o‘zbekiston respublikasi investitsiyalar va tashqi savdo vazirligi to‘G‘risidagi nizomni tasdiqlash haqida

6-bob. Vazirlik rahbarlarining javobgarligi
30. Vazir:
ushbu Nizom va boshqa qonun hujjatlari bilan Vazirlikka yuklangan vazifalar va funksiyalarning o‘z vaqtida va sifatli bajarilishi hamda Vazirlik faoliyatdagi kamchiliklarni bartaraf etish bo‘yicha choralar ko‘rish;
mazkur Nizomning 25-bandida ko‘rsatilgan o‘z funksional vazifalarining (yoki majburiyatlarining) sifatli bajarilishi;
amalga oshiriladigan dasturlar, strategiyalar va konsepsiyalar natijalariga erishish, ularni mamlakat va hududlarning investitsiyaviy hamda tashqi savdo jihatidan rivojlantirishga ta’siri;
Vazirlikda, uning tarkibiy va hududiy bo‘linmalarida ijro intizomiga qat’iy rioya qilinishi uchun mas’uldir.
31. Vazir o‘rinbosarlari:
Vazirlikning mutasaddilik qilinadigan tarkibiy bo‘linmalarida Vazirlikka yuklangan vazifalar va funksiyalarning bajarilishi;
mazkur Nizomning 26-bandida ko‘rsatilgan o‘z funksional vazifalarining (yoki majburiyatlarining) sifatli bajarilishi;
tegishli yo‘nalishlar bo‘yicha topshiriqlarning o‘z vaqtida bajarilishi va natijadorligi;
mutasaddilik qiladigan yo‘nalishlarda investitsiyaviy va tashqi savdo jihatidan rivojlanishni ta’minlash bo‘yicha ko‘riladigan choralar natijadorligi va samaradorligi uchun mas’uldir.
32. Vazirlikning hududiy boshqarmalari boshliqlari:
Qonunchilik hujjatlari, Vazirlik rahbarlarining topshiriqlari hamda yuklangan vazifalar va funksiyalarning o‘z vaqtida va sifatli bajarilishini samarali nazorat qilish;
hududlarni rivojlantirish dasturlarining respublika va tarmoqlarni rivojlantirish bo‘yicha tegishli dasturlar bilan birgalikda belgilangan tartibda ishlab chiqilishini ta’minlash;
Vazirlikka hududlarni investitsiyaviy va tashqi savdo jihatdan rivojlantirish tendensiyalari to‘g‘risidagi obyektiv tahliliy ma’lumotlarni o‘z vaqtida taqdim etilishi;
investitsiyalar va tashqi savdo sohasida amalga oshirilgan hududiy dasturlar ta’sirining natijadorligi;
hududlarni rivojlantirish bo‘yicha yuklangan vazifalarni o‘z vaqtida va sifatli bajarilishini ta’minlash uchun mas’uldir.
33. Vazirlikning tuman (shahar) bo‘limlari boshliqlari:
Qonunchilik hujjatlari, Vazirlik rahbarlari va hududiy boshqarmalar topshiriqlari hamda yuklangan vazifalar va funksiyalarning o‘z vaqtida va sifatli bajarilishini samarali nazorat qilish;
hududlarni rivojlantirish dasturlarining respublika va tarmoqlarni rivojlantirish bo‘yicha tegishli dasturlar bilan o‘zaro bog‘liq holda ishlab chiqish tartibi, metodologiyasi, tamoyillari va muddatlariga rioya etish;
hududiy boshqarmaga ko‘rib chiqish uchun taqdim etiladigan tahliliy materiallarning o‘z vaqtida, sifatli, to‘liq topshirilishini ta’minlash;
hokimliklar rahbarlari bilan birga investitsiyalar va tashqi savdo sohasida tumanlarni (shaharlarni) rivojlantirish dasturlarini amalga oshirish natijalari uchun mas’uldir.