Pitkeriw qánigelik jumısı

Qıs máwsimi arqada oktyabrdiń úshinshi, qublada noyabrdiń ekinshi on kúnliginen baslanıp ol 4-5 ayǵa sozıladı.
1.3.Ósimlik dúniyası
Respublikamızda ósimlik qatlamlarınıń jaylasıwı hám rawajlanıwı onıń tábiyiy sharayatına, ásirese topıraqtıń ıǵallanıw, kebirlenip barıw dárejesine de tikkeley baylanıslı. Olar ózleriniń tábiyiy jasaw sharayatlarına qaray bir-birinen ádewir parq etedi. Ámiwdáryanıń deltasında, ásirese dárya boylarında suwǵarıw tarawlarına jaqın jerlerde ıǵallıqtı súyiwshi ósimlikler menen toǵaylıqlardı ushıratamız. Olardıń ishinde ásirese qamıs, qoǵa, qaraóleń, jeken, urıq ósedi. Usı rayonnıń qurǵaqlaw jerlerinde torańǵıl, jıńǵıllı toǵaylar keń taralǵan bolıp, olarda sheńgel tal, jigildik, qamıs, hár qıylı putalar aralasıp ósedi. Házirgi tiykarǵı toǵaylıqlar Baday, Nurımtúbek, Nazarxan, Shortanbaydıń qaptalında saqlanǵan. Sonday-aq deltada hám Qızılqumnıń ayırım jerlerinde jıńǵıllı hám seksewilli toǵaylar da ushırasadı.
Egislik jerlerdiń átirapında jabayı ósimliklerden aq bas, jantaq, páshek, oshaǵan, sheńgel, boyan, palatı, suw otı, biydayıq, kekire, tekesaqal, ádiraspan, iyt júzim kebirliklerde - qarabaraq, qaramıq hám soranıń bir neshe túrleri ósedi. Egislik jerlerde paxta, salı, júweri, tarı, arpa, biyday, zıǵır, másh, lobiya, jońıshqa, mákke eginleri egiledi, úy qaptalı miywe aǵashları hám gúllerdiń birneshe túrleri ósiriledi.
Respublikamızdıń aymaǵında burın úy-ruzıgershilik buyımları retinde egilip, házir derlik egilmey baratırǵan eginlerden «suwqabaq», «sháńgilqabaq», «nasbayqabaq»lardı ayrıqsha atap ótiw orınlı. Bul mádeniy ósimliklerdiń túrleri bir-birine túrles bolıp, asqabaq, palawqabaq, sıyaqlı bolıp ósedi. Suwqabaq gúze ıdısına usap, moynına jip baylawǵa qolaylı, suw sıyımlılıǵı 10-20 litr, hátteki onnan da kóp.
Sháńgilqabaq jap salmadaǵı suwdı suwqabaqqa quyıw ushın uslawǵa qolaylı ıdıs retinde paydalanılıp kelingen. Onıń suw sıyımlılıǵı 0,5-1,5 litr.
Máyekqabaq kishi shar tárizli, túri ala, qızǵısh hawa reńde. Onı nasıbayqabaq dep te ataǵan, sebebi onı nasıbay salıw ushın da paydalanǵan.
Qaraqalpaqstan Qızılqumı sırtqı kóriniste ósimlikke júdá jarlı kórinedi, al haqıyqatında da onda ósimlik kóp. Bul maydan 5 mln. gektarǵa shamalas jerdi iyelep, onda 830 túrli jabayı ósimlik ósedi. Sonıń 315 túri qumlıq, 204 túri gipsli, al 186 túri shólistanlıq jerlerde, artezian qudıqlarınıń boylarında ósedi.