“Педагогика” фанини ўқитиш бўйича ўқув-услубий мажмуа

2. “Тавсиянома” технологияси талабаларда муайян йўналишда ташкил этиладиган педагогик фаолият самарадорлигини таъминлаш юзасидан муайян тавсияларни илгари суриш кўникмасини шакллантиради. Илгари сурилаётган тавсиялар мазмунан масаланинг ечимини топишга ёрдам бериши, илмий жиҳатдан педагогик амалиётга мос келиши талаб этилади. Методни қўллашда қуйидаги тартибда иш кўрилади: 1) ўқитувчи тавсиянома тайёрлаш талаб этилган масалани аниқлаштиради; 2) талабаларга бу ҳақида эълон қилади; 3) талабалар фикр юритиш асосида масаланинг ечимини топишга ҳаракат қиладилар; 4) масаланинг умумий моҳиятини қайта ёдга олиш орқали унинг муҳим жиҳатларини белгилаб олинади; 5) белгиланган муҳим жиҳатларга таянган ҳолда муайян тавсиялар ишлаб чиқилади; 6) илгари сурилаётган тавсиялар ва уларнинг самарадорлиги муҳокама қилинади; 7) якуний хулосага келинади.
Технологияни қўллашда талабалар гуруҳ ёки жуфтликларга бириккан ҳолда ёки алоҳида фаолият юритишлари мумкин. Машғулот жараёнида талабалар томонидан илгари сурилган барча тавсиялар умумлаштирилади.
4-мавзу: Дидактика таълим назарияси сифатида. Таълим парадигмалари. Таълим жараёни ягона педагогик тизим сифатида. Таълим тамойиллари
Машғулот учун материаллар
I. Талабалар учун топшириқ.
Блиц-сўров саволларига жавоб қайтаринг.
Бу ўринда талабаларнинг эътиборларига қуйидаги саволлар ҳавола этилади:
1. “Дидактика” тушунчаси қандай маънони англатади?
2. Дидактика нимани ўрганади?
3. Таълим жараёнлари ва уларни амалга ошириш шартларини таърифлаш ва тушунтириш; таълим жараёнини янада мукаммал ташкил этиш, яъни таълим тизимлари ва технологияларини ишлаб чиқиш; таълим жараёни учун хос бўлган умумий қонуниятларни аниқлаш, омилларни таҳлил қилиш ва таърифлаш. Бу ҳолатлар дидактиканинг қайси жиҳатларини ёритмоқда?
4. “Таълим парадигмалари” тушунчасини таърифланг.
5. Таълим жараёнини бошқариш қандай босқичларда ташкил этилади?
6. Билимларни ўзлаштириш жараёнининг босқичларини санаб ўтинг.