Кичик гуруҳ (3-4 ёш)

Ҳайвонот дунёси. Ёввойи ҳайвонлар. Ўрмон ҳайвонлари: бўри, қуён, 
айиқ ҳақидаги билимларини мустаҳкамлаш ҳамда шер ва йўлбарс ҳақида 
тушунча бериш. Ҳайвонларнинг ташқи қиёфаси, яшаш тарзи, ўзига хос 
хусусиятларини таърифлаш кўникмасини шакллантириш. Улар қаерда 
яшайди, ўзига қандай уй қуради, қандай юради, кузда, қишда нима билан 
озиқланади, қишга қандай тайёргарлик кўради. Болани ҳайвонларнинг 
кўриниши ва табиатидаги ўхшашлик ва фарқли томонларни ажратиш 
(ўрмон ҳайвонлари, йиртқич ҳайвонлар)ни ўргатиш. 
Айрим ҳайвонлар (дайди ит ва мушуклар) билан бевосита мулоқот 
қилишнинг хавф-хатари тўғрисида болага алоҳида тушунча бериш ва 
қаттиқ таъкидлаб айтиш. Ҳайвонларга нисбатан эҳтиёткорона муносабатда 
бўлишни тушунтириш. 
Уй ҳайвонлари (туя, от, сигир, қўй, эчки) ва паррандалар (товуқ, 
хўроз, курка, ўрдак)нинг ҳаёти ва шароитлари ҳақидаги билимларини 
мустаҳкамлаш. Одамлар уй ҳайвонлари ҳаёт кечириши учун зарур бўлган 
шароитни яратиши, уй ҳайвонларининг кишилар ҳаётида тутган ўрни, 
фойдаси ҳақидаги тасаввурларини кенгайтириш.
Қушлар (лайлак, турна, қизилиштон)нинг овқатланиши, ташқи 
кўриниши, ўзаро ўхшаш ва фарқли томонларини ажратишга ўргатиш. 
Болага республикамизда қишлаб қолувчи қушлар ҳақида тушунча бериш,
уларга қишда ғамхўрлик кўрсатиш ва хайрихоҳлик муносабатини 
тарбиялашни давом эттириш. 
Баҳор фаслида кунлар илиши билан барча ҳайвонлар ва паррандалар 
фаол ҳаёт бошлаши ҳақидаги тасаввурларини бойитиш. Қушларнинг 
ҳаракатини кузатиш, ин қуриши, тухум қўйиши, бола очиши ҳақидаги 
тушунчаларини кенгайтириш. 
Бола билан қушларнинг сайрашини тинглаш ва фарқлашни ўргатиш, 
қушларнинг иссиқ ўлкаларга учиб кетиши ҳақида суҳбатлашиш.
Ниначи, чумоли, асалари, хонқизи, тиллақўнғиз, капалакларнинг 
ҳаёт тарзи, озиқланиши (капалак, асалари – гуллар шираси билан 
озиқланади в.б.), улар ўз душманларидан қочиш учун яхши 
мослашганликлари (ниначи, капалак тез учади, чигиртка сакрайди) ҳақида 
қизиқарли мисоллар билан тушунтириш.
Жониворлар яшайдиган турли муҳит (балиқ – сувда, бўри – ўрмонда, 
қурбақа – ботқоқликда; капалак ва чигирткалар – ўтлоқда) ҳақидаги 
тасаввурини кенгайтириш. 
Болани аквариумдаги балиқларга озуқа бериш ва қафасдаги
қушларга, жониворларга сув, дон бериб, меҳрибон бўлишга ундаш.