Зулмат остонасидаги муҳаббат (2-фасл) “янги ой” Стефани Майер

 https://telegram.me/e_kutubxona

---

87
бўлмасам, демак дадамнинг ҳаёти қил устида бўлади. Қўрққанимдан
тишларим такиллаб кетди. Қўрқувга эрк бермаслик учун хаёл сура
бошладим. Хаёлимда бўрилар Лоранни ғажиб ташлашади. Бу фикрдан
кейин бир оз тинчландим. Агар у бўриларга ем бўлса,
Виктория менинг
ёлғизлигимдан бехабар қолади ва мени ҳамон Калленлар қўриқлаяпти деб
ўйлайди. Менинг меҳрибон вампирларим энди ҳеч қачон қайтиб
келишмайди...
Туни билан тушимда кўзлари аламдан ёнган Викториянинг чиройли
чеҳраси таъқиб қилди. Тонгдан яна қулоқларим остида Лораннинг сўзлари
жаранглай бошлади: "У сенга тайёрлаб қўйган қасосни билсанг эди...".
Қичқириб юбормаслик учун қўлларим билан оғзимни бекитдим.
XI боб. Тўда
Ҳар тонг, кўзимни очганимда тунни эсон-омон ўтказиб олганимга шукр
қиламан. Ўрнимдан туриб дадамнинг соғ-саломатлигига ишонч ҳосил
қилмагунимча юрагим тинчимайди. Дадам менинг “тиқ” этган товушга
ҳам сакраб турадиган бўлиб қолганимдан хавотирда эканлигини биламан.
Саволларига қараганда буни Жейкобдан кўраётгани аниқ. Доимий қўрқув
туфайли Жейкоб билан учрашмаганимга бир ҳафта бўлгани ҳам бутунлай
ёдимдан кўтарилибди. У бирор марта ҳам қўнғироқ қилмади. Уни жуда
кўргим келарди. Ёлғизликдан қийналиб юрганимда бу қўрқув аҳволни
баттар чигаллаштирди. Мен унинг беташвиш, самимий кулгусини, омонат
гаражида ўтган қўрқувдан ҳоли кунларимни соғинардим. Душанба куни
кечгача унинг қўнғироғини кутдим, дўсти Эмбрининг ташвишидан ортса
мени эсга олар, деб ўйладим. Сешанба куни сабрим чидамай ўзим
қўнғироқ қилдим, лекин ҳеч ким гўшакни кўтармади. Шу билан
чоршанба, пайшанба куни ҳам кечқурун ўн биргача қўнғироғимга ҳеч ким
жавоб бермади.
Ўзим Ла-Пушга бора олмасдим. Чунки йўлда Лоранга ёки Викторияга дуч
келишим мумкинлигидан қўрқардим. Ёнимда Жейкоб бўлганида уларни
учратишни истамасдим. Кўнглим оғриса-да, айни пайтда Жейкоб мендан
ўзини олиб қочиб юрганидан хурсанд бўлдим. Лекин дадамни қандай
ҳимоя қилишни билмайман. Агар ростини айтсам, дадам мени яшириш
учун бирор жойга қамаб қўяди. Мен шунга ҳам рози эдим, агар бу билан
дадамнинг ҳаётини сақлаб қола
олсам. Виктория мени қидириб, энг
аввало, уйимга келади, агар бир ўзим уйдалигимда келса майли, агар...
Шу сабаб уйдан қочиб ҳам кета олмасдим.
Қочиб қаерга ҳам борардим? Ойимнинг ёнигами? Виктория ойимнинг
уйига ҳам боришини ўйлаб сесканиб кетдим.