O’zbekiston tarixi kafedrasi о‘zbekiston tarixi fanidan

Fon Kaufman – nemis dvoryanlaridan chiqqan general. Rossiya imperiyasi ma’muriyatining sodiq va ishonchli xizmatkorlaridan biri. Barcha lavozimlarda podsho siyosatini ko‘ngildagidek amalga oshirgan shaxs. 1868-1876 yillarda Turkistondagi harbiy yurishlarda istilochi sifatida tanilgan. 1867-1882 yillarda Turkiston general-gubernatori. Turkistonda general-gubernatorlik boshqaruvi Kaufmanning cheklanmagan istibdosi asosida amalga oshirilgan.
Chernyayev – rus harbiylari orasida cho‘rtkesarligi va o‘ta jangarligi bilan mashhur bo‘lgan. Mahalliy aholiga nisbatan o‘ta salbiy munosabatda bo‘lgan shafqatsiz polkovnik Chernyayev 1864 yilda Avliyo ota shahrini egallagani uchun general-mayor unvonini olgan. U 1865-1866 yillarda Turkiston viloyat harbiy gubernatori, 1882-1884 yillarda Turkiston o‘lkasi general-gubernatori bo‘lgan.
Shahar nizomi – 1870 yil 16 iyunda aholining o‘sishi va shaharlar hududining kengayishi munosabati bilan Rossiyada qabul qilingan. 1872 yilda Sirdaryo viloyati boshqarmasining umumiy rayosati ushbu nizomni Toshkentda ham qo‘llash masalasini ko‘tarib chiqqan. Shunga ko‘ra, mustamlakachilar manfaatlariga mos holda maxsus loyiha tayyorlanib, ushbu loyiha maxsus komissiya tomonidan atroficha muhokama etilgan bo‘lsa-da, bu masala 1877 yildagina hal bo‘lgan. Rossiya imperiyasida shaharga oid ikkita nizom (1870, 1892 yy.) qabul qilingan bo‘lib ular Turkiston o‘lkasining Toshkent va Verniy (Almati) shaharlarining faqat ruslar yashaydigan «yangi» qismlarida qo‘llanilib, boshqa shaharlarga joriy etilmagan.
Elchilar – turli davrdarda davlatlar o‘rtasidagi iqtisodiy, siyosiy va madaniy munosabatlar o‘rnatilishida davlat boshliqlarining ishonchli vakillari. Elchilar davlat boshlig‘i nomidan muzokoralar olib borganlar. Yuborilayotgan davlat manfaatlari nuqtai nazaridan elchilar o‘z vazifalaridan tashqari josuslik vazifasini ham bajarganlar. Rossiyaning O‘rta Osiyo xonliklariga elchilari XVI asrning o‘rtalaridan boshlab tashrif buyura boshlagan bo‘lsa, XVIII asr davomida xonliklarga 9ta elchi kelgan. Bekovich Cherkasskiy, F.Beneveni, Xo‘ja Nafas, Ernazar Maqsud o‘g‘li, Nikiforov, N.Ignatyev kabilar keyingi davrlarda faoliyat yuritganlar.