O`zbekiston respublikasi oliy va o`rta maxsus ta`lim vazirligi toshkent davlat texnika universiteti “Geologiya qidiruv” fаkultеti “Nеft va gazni qayta ishlash ob’ektlari” kаfеdrаsi «korroziyadan himoya qilish»

11.3. Коррозион бардошлиликни ошириш мақсадида
пўлатларни легирлаш
Пўлатларга керакли механик хоссаларни бериш, уларнинг коррозион бардошлилигини ошириш мақсадида уларнинг таркибига легирловчи элементлар киритилади. Легирловчи элемент темир билан қаттиқ эритма ҳосил қилади, бир-бири билан ёки қўшимча элементлар билан таъсирлашиб, металлмас бирикмалар ёки қўшимча фазалар ҳосил қилади.
Стандартларга асосан, ҳар бир маркали пўлат таркибидаги легирловчи ва қўшимча элементларнинг миқдори маълум бир рухсат этилган чегара доирасида бўлади.
Паст легирланган пўлатларнинг таркибида асосан, уларга маълум механик ёки технологик хусусиятлар ҳосил қилиш мақсадида киритилган бир неча процентгача легирловчи элемент бўлади.
Алоҳида гуруҳ сифатида таркибига 12 % ва ундан юқори (30 % гача масс) миқдорда муқаррар хром қўшиладиган коррозияга бардошли пўлатларни ажратиб кўрсатиш мумкин. Бу гуруҳдаги пўлатлар углеродли ва паст легирланган пўлатлар бардош бера олмайдиган, кимё саноатига хос бўлган ўта агрессив муҳитларда ишлатиш учун махсус ишлаб чиқарилади.
Коррозияга бардошли пўлатларнинг классификацияси, номенклатураси ва кимёвий таркиби ГОСТ 5632-72 билан меъёрланган бўлади.
Хром ҳар хил кислотали ва анион таркибли муҳитларда пассивланишга юқори мойилликни намоён қилади. Шунингдек у питтинг коррозиясига чидамлидир. Хромнинг сулфат кислотасида эришнинг қутбланиш эгрилиги 11.2-расмда келтирилган (2 эгрилик). Пассивланиш соҳаси темирга нисбатан янада манфийроқ потенциалда бошланади, пассивланишнинг критик токи эса икки маротаба кичик. Бу хромнинг пассивланишга темирга нисбатан янада юқори мойилликка эга эканлигидан далолат беради.
Хромнинг пассивлиги унинг сиртида ҳосил бўладиган Cr₂O₃ оксид қатлами билан таъминланади.

11.2-расм. Турли металлар учун эриш тезлигининг потенциалга боғлиқлиги
1–темир; 2–хром; 3–никел. Эритма 1 н. H₂SO₄, хона ҳароратида.