O’zbekiston respublikasi oliy va o’rta maxsus ta’lim vazirligi andijon qishloq xo‘jaligi va agrotexnologiyalar instituti

Bozulbang (Лагохилус), (Лагохилус опьяняющий) - Lagochilus inebrians Bge.
Bozulbang О‘zbekiston, Turkmaniston va qisman Tojikistonning ayrim viloyatlaridagi adirlar va shag’alli tog’ yonbag’irlarida o’sadi. Bozulbang o’simligining yer ustki qismi - guli va bargi xalq tabobatida keng foydalaniladi. Guli va bargi tarkibida 0,2% efir moyi, C va К vitaminlari, karotin, organik kislotalar, qand, smola, 0,67% flavonoidlar, lagoxilin, 11- 14% oshlovchi va boshqa biologik faol moddalar bor.
Bozulbangning dori preparatlari (damlama, nastoyka va quruq ekstrakti tabletka holida va logoden preparati) qon ivishini tezlatish va qon bosimini pasaytirish ta’siriga ega bo’lgani uchun o’pkadan, burundan qon oqishini to’xtatish hamda bavosil, gemofiliya, giper- toniya kasalliklarini davolash uchun qo’llaniladi.
Bozulbangdan tayyorlangan damlama yoki qaynatma xalq ta­bobatida qon to’xtatuvchi vosita sifatida ishlatiladi. Bozulbang kamyob, yo’qolib borayotgan o’simlik sifatida “Qizil kitob” ga kiritilgan. Shuning uchun uni tabiiy o’sish joylaridan xomashyosini yig’ish taqiqlangan.

Qumloq bo’znochi (Бессмертник песчаный)- Helichrysum arenarium (L.) Moench.
Bo’znoch o’simligi Astradoshlar (murakkabguldoshlar) - Asteraceae (Compositae) oilasiga mansub bo’lib, bo’yi 30 sm gacha o’sadigan ko’p yillik o’t o’simlik hisoblanadi. Poyasi tik o’sadi, bir nechta, shoxlanmagan bo’ladi. Ildiz oldi barglari qisqa bandli, poyadagilari bandsiz ketma-ket joylashgan. Bo’znochning barglari cho’ziq teskari tuxumsimon (poyasining yuqori qismidagilari nishtarsimon-chiziqsimon), tekis qirrali. Sariq gullari sharsimon savatchaga to’planib, qalqonsimon tuvakgul to’plamini hosil qiladi. Mevasi — pista. O’simlikning poyasi va barglari sertuk shuning uchun kulrang ko’rinadi. Bo’znoch iyun-avgust oylarida gullaydi, mevasi avgust-sentabrda yetiladi.
Bo’znoch MDH ning Yevropa qismida, Kavkaz, G’arbiy Sibir, janubiy Qozog’iston va Markaziy Osiyo tog’larining qumli nam yerlarda o’sadi.
Tibbiyotda guli qo’llaniladi. Guli tarkibida flavonoidlar, kumarinlar, efir moyi, inozit, Kvitamini, bo’yoq, oshlovchi va boshqa faol moddalar bor. Flavonoidlar summasi naringenin, apigenin, kempferol va ularning glikozidlari, salipurpozid va boshqalardan tarkib topgan.