O’zbеkistоn rеspublikаsi оliy vа o’rtа mахsus tа’lim vаzirligi nizоmiy nоmidаgi tоshkеnt dаvlаt pеdаgоgikа univеrsitеti

Оила педагогикаси фанининг илмий-тадқиқот методлари. Оила педагогикаси фани ривожи оилавий муносабатлар ва фарзанд тарбиясидаги муаммоларни тадқиқ этиш мақсадида олиб бориладиган тадқиқот ишларининг ғояси, мазмуни ҳамда натижалари ҳисобига таъминланади. Ижтимоий ва ишлаб чиқариш жараёнининг кескин ривожланиши шахсни ҳар томонлама камол топтириш имконини берувчи омил ҳамда педагогик шарт-шароитларни аниқлаш, жамият ва шахс маънавиятига зиён етказувчи ҳолатларни бартараф этишни тақозо қилади. Тарбия жараёнининг моҳиятини англаш уларни кенг ёки тор доирада ўрганиш, мавжуд кўрсаткичлар воситасида уларнинг содир бўлиш сабабларини ўрганиш, зарур чора-тадбирларни белгилаш илмий изланишларни ташкил этиш заруриятини юзага келтиради. Тарбия жараёнида мақсадга мувофиқ келувчи, мақбул ва айни вақтда самарали бўлган методларни танлай олиш ҳам муҳим аҳамият касб этади.
Тарбия масалаларига оид илмий тадқиқотларни амалга ошириш мураккаб, муайян муддатни тақозо этувчи, изчиллик, узлуксизлик, тизимлилик ҳамда аниқ мақсад каби хусусиятларга эга бўлган жараён бўлиб, унинг самарали бўлиши учун бир қатор шартларга риоя этиш зарур. Улар қуйидагилардир:

1. 
   муаммонинг долзарблиги ва мавзунинг аниқ белгиланганлиги;
   
2. 
   илмий фаразларнинг тўғри шакллантирилганлиги;
   
3. 
   вазифаларнинг тадқиқот мақсади асосида тўғри белгиланганлиги;
   
4. 
   тадқиқот методлар тизимига нисбатан объектив ёндашув;
   
5. 
   тажриба-синов ишлари жараёнига жалб этилувчи респондентларнинг ёш, психологик ва шахсий хусусиятлари, шунингдек, шахс ривожланиши қонуниятларининг тўғри ҳисобга олинганлиги;
   
6. 
   тадқиқот натижаларини олдиндан ташҳислаш ва унинг натижаларини айтиб ўтиш;
   
7. 
   тадқиқот натижаларининг кафолатланганлиги.
   

Замонавий шароитда оила тарбияси муаммоларини тадқиқ этишда қуйидаги илмий-педагогик методлардан фойдаланилмоқда:

1. 
   Педагогик кузатиш.
   
2. 
   Суҳбат методи.
   
3. 
   Анкета методи.
   
4. 
   Интервью методи.
   
5. 
   Тест методи.
   
6. 
   Педагогик тажриба методи.
   
7. 
   Ижтимоий-педагогик ретроспектив метод.
   

8. Математик-статистик метод

Қуйидаги мазкур методларнинг оила тарбияси муаммоларини тадқиқ этишдаги ўрни ва роли хусусида сўз юритилади.