O‘zbekiston respublikasi adliya vazirligi toshkent davlat yuridik Universiteti Jinoyat-protsessual huquqi darslik

T

TERGOVGA QADAR TEKSHIRUV – jinoyat haqidagi ariza yoki xabar yuzasidan sodir etilgan (tayyorgarlik koʻrilgan) qilmishning jinoiyligi, ijtimoiy xavfliligi, huquqqa xilofligi va jazoga sazovorligi haqida masalani tekshirishga qaratilgan harakatlar majmuyi.

TERGOVGA QADAR TEKSHIRUVNI AMALGA OSHIRUVCHI ORGANLAR – JPKning 391-moddasida keltirilgan va jinoyat alomatlarini va jinoyat sodir etgan shaxslarni topish, JPKning qoidalariga muvofiq tekshirib chiqilganidan soʻng jinoyat ishi yuzasidan dalil tariqasida foydalanish mumkin boʻlgan ma’lumotlarni aniqlash vazifasi yuklatilgan hamda tergovga qadar tekshiruvni boshlashga yoki oʻziga boʻysunuvchi boshqa mansabdor shaxsga uni yuritishni topshirishga, jinoyat ishini qoʻzgʻatishga yoki ish qoʻzgʻatishni rad etishga yoxud arizani, xabarni tergovga tegishliligiga koʻra oʻtkazishga haqli boʻlgan organlar va ularning mansabdor shaxslari.

TERGOVGA QADAR TEKShIRUV DAVOMIDA OʻTKAZILADIGAN HARAKATLAR – qoʻshimcha hujjatlar, tushuntirishlar talab qilib olish, shuningdek shaxsni ushlab turish, hodisa sodir boʻlgan joyni koʻzdan kechirish, ekspertiza oʻtkazish, taftish tayinlash va tezkor-qidiruv tadbirlarini oʻtkazish haqida topshiriqlar berish mumkin.

TERGOVGA TEGISHLILIK BOʻYICHA YUBORISH – arizada keltirilgan holatlar yuzasidan tergovga qadar tekshiruv yoki dastlabki tergovni amalga oshirish ariza berilgan organning vakolatiga kirmaydigan hollarda ariza yoki xabarni predmetli yoki hududiy tergovga tegishliligiga qarab yuborish.

TERGOVGA TEGISHLILIK jinoyat ishining xususiyati boʻlib, unga asosan u yoki bu organ yoxud mansabdor shaxs shu ish boʻyicha dastlabki tergovni amalga oshirishga vakolatli boʻladi.