O‘zbekiston respublikasi adliya vazirligi toshkent davlat yuridik Universiteti Jinoyat-protsessual huquqi darslik

Muammoli savollar va kazuslar

1. Gumon qilinuvchi va ayblanuvchi tariqasida ishtirok etishga jalb qilish toʻgʻrisidagi qarorda nimalar koʻrsatilishi zarur?
2. Gumon qilinuvchi va ayblanuvchi tariqasida ishtirok etishga jalb qilish haqidagi qarorni e’lon qilishda himoyachi ishtirokining ahamiyati nimalarda namoyon boʻladi?
3. Ayb e’lon qilish, ayblovni oʻzgartirish, tugatish va toʻldirish hamda tugatilgan ayblovni qayta tiklash tartibini yoritib bering.
Kazus
Toshkent shahar prokuraturasi Oʻta ogʻir jinoyatlarni tergov qilish boʻlimi tergovchi B.Yoʻlchiyev tomonidan bir guruh shaxslarga nisbatan Oʻzbekiston Respublikasi JKning 97-moddasi 2-qismi “a” bandi bilan jinoyat ishi qoʻzgʻatildi va tergov harakatlari olib borildi. Jinoyat ishi 32 jilddan iborat edi.
Tergov davomida bir guruh shaxslar tomonidan Oʻzbekiston Respublikasi JKning boshqa moddalarida nazarda tutilgan jinoyatlarni ham sodir qilganliklari aniqlandi. Natijada tergovchi tomonidan jinoyat ishlarini birlashtirish, ayrimlarini esa ajratish toʻgʻrisida qaror chiqarildi.
Oʻzbekiston Respublikasi Bosh prokurori tomonidan dastlabki tergov muddati 7 oyga qadar uzaytirildi. Ammo ushbu muddat tergov harakatlarini olib borish va gumon qilinuvchilarni ayblanuvchi tariqasida jinoyat ishiga jalb qilish uchun yetarli emasligi ma’lum boʻldi.
Mazkur holatni Oʻzbekiston Respublikasi jinoyat-protsessual qonunchiligi asosida tahlil qilgan holda huquqiy baho bering.

XVIII BOB. DASTLABKI TERGOVNI TOʻXTATISH VA QAYTA TIKLASH

(Muallif – M.Salomov)


Annotatsiya: o‘quvchilar uchun mazkur mavzu oʻrganilishi dastlabki tergovni toʻxtatish asoslari va tartibi, tergovchining dastlabki tergov toʻxtatilganidan keyingi harakatlari, shuningdek toʻxtatilgan jinoyat ishi boʻyicha dastlabki tergovni qayta tiklash asoslari va tartibini tushunishga imkon beradi.

18.1. Dastlabki tergovni toʻxtatish va qayta tiklash tushunchasi hamda ahamiyati

Protsessual harakatni toʻxtatish deganda jinoyat protsessining bosqichlarida – dastlabki tergovda, jinoyat ishini sudda koʻrish uchun tayinlashda, sud muhokamasida ma’lum bir harakatlarni amalga oshirishni toʻxtatish nazarda tutiladi.

Dastlabki tergovni to‘xtatish – jinoyat-protsessual qonunchilikka binoan surishtiruvchi, tergovchi, prokurorning qarori bilan to‘xtatilgan jinoyat ishlari bo‘yicha surishtiruvchi, tergovchi, prokurorning protsessual faoliyati, jinoyat sodir etgan shaxs aniqlangunga qadar, yashiringan ayblanuvchi qidirib topilgunga qadar yoki qonunda belgilangan boshqa holatlar bartaraf etilgunga qadar jinoyat ishini yuritishni amalga oshirib bo‘lmasligi tushuniladi.



To‘xtatilgan jinoyat ishini qayta tiklash – bu vujudga kelgan jinoyat ishini to‘xtatish holatlarining protsessual va tashkiliy harakatlar natijasida bartaraf etilishi hamda qonunchilikda belgilangan boshqa harakatlar bajarilishidir.