O‘zbekiston respublikasi adliya vazirligi toshkent davlat yuridik Universiteti Jinoyat-protsessual huquqi darslik

21.5. Sud majlisiga chaqirilishi lozim boʻlgan shaxslarning roʻyxatini oʻzgartirish. Jinoyat ishini sudga yuborish

Tergovchi yoki surishtiruvchi tomonidan tuzilgan sudga chaqirilishi lozim boʻlgan shaxslarning roʻyxati qatʻiy emas. Uni prokuror qisqartirishi yoki toʻldirishi mumkin. Roʻyxatni qisqartirish yoki toʻldirishda jinoyat ishi hujjatlaridan faydalaniladi, biroq prokuror oʻzining protsessual holatiga koʻra, ayblanuvchi, uning himoyachisi iltimosnomasi asosida jinoyat ishi boʻyicha tergovchi yoki surishtiruvchi tomonidan roʻyxatga kiritilgan shaxslarni chiqarib tashlashga haqli emas. Shuningdek, jinoyat ishi boʻyicha huquqiy manfaatga ega boʻlgan shaxslar, ya’ni ayblanuvchilar, muomala layoqatiga ega boʻlgan jabrlanuvchilar, voyaga yetmagan ayblanuvchining qonuniy vakili, shuningdek fuqaroviy da’vogar deb e’tirof etilgan shaxslar yoki fuqaroviy javobgar tariqasida ishda ishtirok etishga jalb qilinganlar va ularning vakillari roʻyxatdan chiqarib yuborilishi mumkin emas.

Mavzu boʻyicha xulosalar

Mazkur mavzuni oʻrganishda o‘quvchilar tergovga qadar tekshiruv, tezkor-qidiruv, surishtiruv va dastlabki tergov organlari tomonidan qonunlarni ijro etilishi ustidan prokuror nazorati va uni amalga oshirishda prokuror vakolatlari, koʻp vaqeali jinoyat ishlari boʻyicha prokurorning vakolatlari toʻliq bajarilishi, ayblov xulosasi yoki ayblov dalolatnomasi bilan kelgan jinoyat ishi yuzasidan prokuror hal etishi lozim boʻlgan masalalarni hal qilishda va ayblov xulosasi yoki ayblov dalolatnomasi bilan kelgan jinoyat ishi yuzasidan prokuror qarori chiqarilishida qonuniylik ta’minlanishi, ehtiyot chorasi toʻgʻrisidagi qarorni tuzish, sud majlisiga chaqirilishi lozim boʻlgan shaxslarning roʻyxatini oʻzgartirish, jinoyat ishini sudga yuborishda protsessual qonun talablariga qatʻiy rioya qilish koʻnikmalariga ega boʻlishlari lozim.

Muammoli savollar va kazuslar

1. Tergovga qadar tekshiriv, tezkor-qidiruv faoliyati, surishtiruv va dastlabki tergov bosqichlarida qonunlar ijrosi ustidan prokuror nazoratining maqsad va vazifalariga ta’rif bering.
2. Tergovga qadar tekshiriv, tezkor-qidiruv faoliyati, surishtiruv va dastlabki tergov bosqichlarida prokuror vakolatlarining huquqiy asoslari ga taʻrif bering.
3. Tergovga qadar tekshiriv, tezkor-qidiruv faoliyatini amalga oshirayotgan, surishtiruv va dastlabki tergovni yuritayotgan shaxs tomonidan yoʻl qoʻyilgan qonun va jinoyat-protsessual normalarnining buzilishi yuzasidan prokuror vakolatlari.
4. Surishtiruv va dastlabki tergov bosqichlarida prokurorning tergov harakatlaridagi ishtiroki va tergovning yoʻnalishini belgilashdagi vakolatlari.


Kazus
Ichki ishlar organi tergovchisi tomonidan voyaga yetmagan T.Sobirovga nisbatan jinoyat ishini tergov qilish jarayonida ichki ishlar organining rahbari ayblanuvchining yaqin qarindoshi ekanligi aniqlangan. Shu bois tuman prokurori, mazkur jinoyat ishini prokuratura organining tergovchisiga oʻtkazish haqida qaror chiqargan.