O’simlik to‘qimalari. To’qimalar Tuzilish va funksiyalari

Po’stloq (Ritidom). Ko‘p yillik daraxt o‘simliklarning poyalari va ildizida po’kak o‘rnini asta-sekin po‘stloq egallaydi. Daraxtsimon o‘simliklar poyasi kambiy qavatining uzluksiz rivojlanishi natijasida doimo eniga o‘sib yo‘g‘onlashib turadi, poyaning ana shunday eniga o’sish davomida 2-3 yildan so’ng periderma yoriladi. Poya po’stlog‘ining ichki qatlamlaridan yangi fellogen hosil bo‘ladi va undan yangi po’kak qavati rivojlanadi. Bir necha yildan keyin esa poyaning tashqi tomonida joylashgan po‘stloqning hamma to‘qimalari, shu jumladan erta hosil bo‘lgan fellogen va fellodermalar ham o‘ladi. Ana shu markaziy silindrdan ajralgan va uning tashqi tomonida joylashgan po‘stloqning o’lik to‘qimalar yig‘indisiga po’stloq deyiladi. Demak, po’stloq bu hujayralari o‘lgan har xil to’qimalar yig’indisidir (9-rasm).

Shu sababli po’stloq po’kakga qaraganda o‘simliklarning ichki to‘qimalarini tashqi muhitning har xil noqulay ta’sirlaridan ishonchli asraydi. O’rmon mintaqasida o‘suvchi o‘simliklarning quruq po‘stloqlarida zamburug‘, lishaynik va yo’sinlar hayot kechiradi. Tropik va subtropik mamlakatlardagi o‘simliklarning quruq po‘stloqlarida esa hattoki yuksak o’simliklar - epifitlar yashaydi. Vaqt o‘tishi bilan bazi bir daraxtlarda (tok, chinor) po’stloq to‘kilib turadi.