|
6 – mavzu. Vatan va vatanparvarlik
Yolg‘izlik –odamzod nasliga balo,
Yolg‘izlikda dard ham ozaymas aslo.
O‘qish uchun material
“Agar biz ahil bo‘lsak, el-yurt manfaati yo‘lida bir tanu bir jon bo‘lib yashasak, o‘zimizdan sotqin chiqmasa,
o‘zbek xalqini hech kim hech qachon yenga olmaydi”.
Islom Karimov
Vatan tuyg‘usi
Tinchlik qaror topgan yurtda xotirjamlik hukm suradi, jamiyatda har tomonlama yuksalish va rivojlanish ro‘y beradi. Odamlarning o‘zaro bir- birlariga bo‘lgan ishonch va sadoqatlari, mehr-muruvvatlarining samimiy bo‘lishi ham asosan yurt tinchligining samarasidir. Yurtimizdagi xotirjamlik va barqarorlik tufayli xonadonlarda to‘yu tomoshalar, bayramu shodiyonalar bir-biriga ulanib ketmoqda. Bu ne’matlarga chin ma’noda shukrona qilish va ularning qadriga yetish kerak.
Agar notinchlik hukm surayotgan yurtlarga nazar tashlasak, yurtimizdagi tinchlik va osoyishtalikka ming bora shukur qilamiz. Ma’lumotlarga ko‘ra, bugungi kunda dunyoda 600 ga yaqin terrorchi tashkilotlar mavjud bo‘lib, ularning ko‘pchiligi islom niqobi ostida faoliyat olib bormoqda.
Aslida mazkur terrorchilik harakatlarining islom diniga hech qanday aloqasi yo‘q. Chunki tinchlik, insonparvarlik va rahm-shafqat dini bo‘lgan islom hech qachon zo‘ravonlikni, birovlar joniga qasd qilishni, adolatsizlikni targ‘ib qilmaydi.
Islom dini kishilarni tinchlikni asrash va barqarorlikni ta’minlash yo‘lida iymon, insof, adolat, hamjihatlik va birdamlik bilan harakat qilishga, fitna va o‘zaro adovatga barham berishga chaqiradi. Bu bejiz emas, albatta. Zero, vatanparvarlik islom dinining mohiyatini tashkil etadi.
“Vatanparvar – o‘z vatani kamoloti yo‘lida, o‘z xalqiga muhabbati tufayli moli, kuch-g‘ayrati tugul, jonini ham ayamaydigan, xalqi va vatanining ozodligi, farovonligi uchun borini fido qiluvchi insondir”,– degan ekan mutafakkirlardan biri.
Vatanni sevish, vatanparvar bo‘lish, undagi bor narsalarni ardoqlab, sog‘inib yashash insoniyat tabiatida mavjud bo‘lgan nozik his- tuyg‘udir.
Vatan himoyasi barchamizning muqaddas burchimiz!
Suhbat matni
Shiroq
O‘rta Osiyo xalqlari qadim zamonlardan o‘zlari tug‘ilib o‘sgan yurtni tashqi dushmanlardan mardonavor himoya qilganlar. Bu janglarda qo‘shni qabilalar: skiflar, massagetlar, so‘g‘dlar, saklarning qo‘rqmas yigitlari mardlik va jasorat ko‘rsatganlar. Tarixda ba’zan bir kishining butun qo‘shinga bas kelgan hollari ham bo‘lgan. Bunga oddiy cho‘pon yigit Shiroqning ko‘rsatgan qahramonligi misoldir. Shiroq o‘z podshohi huzuriga kelib, Eron qo‘shinini bir o‘zi hiyla bilan halok etishini aytadi. Buning evaziga o‘zining oilasi, bolalari, avlodiga g‘amxo‘rlik qilishlari to‘g‘risida va’dalarini oladi...
Shiroq o‘zining quloq, burunlarini kesib, butun a’zoyi badaniga ozor yetkazadi. O‘zini rosa qiynab, azoblangan holatga keltirgach, Eron qo‘shinlari joylashgan tomonga ketadi. Hamma yog‘i qonga belangan Shiroq Eron shohi Doroga arz qilib, uni qabiladoshlari shunday ahvolga solganliklarini aytadi. U saklardan o‘ch olish maqsadida Doro qo‘shinini saklar yashiringan joyga boshlab borishga ahd qilganligini ma’lum qiladi. Unga ishongan Doro qo‘shini bir haftalik oziq-ovqat, suv olib yo‘lga tushadi. Uzoq yo‘l yurilgach, Doro qo‘shinining oziq-ovqatlari, suv va otlarga beradigan yemishlari tugaydi. Atrof esa suvsiz quruq, qum va hech narsa o‘smagan sahro edi.
Shunday qilib, cho‘pon Shiroqning bir o‘zi vatandoshlarini saqlab qoladi va bosqinchi Eron qo‘shinining ochlik, suvsizlikdan qirilib ketishiga sababchi bo‘ladi.
Tarjima mashqi
Mardlik
Mardlik – bu insonning oliy fazilati bo‘lib, unda botirlik, qahramonlik, sadoqat, vafo mujassamdir. Mardlik fazilatiga ega bo‘lgan insonlar har qanday vaziyatda ham odamlar uchun jonini berishdan toymaydilar. Ular vafoli va sadoqatli bo‘ladilar. Odamlarga hamkorlik qiladilar.
Mard kishi bir so‘zli, jasoratli, o‘ktam bo‘ladi. O‘z orzu- niyatlarini amalga oshirishda faqat iqtidoriga, bilim, kuch-g‘ayratiga ishonadi. Mard kishi o‘z obro‘- e’tiborini, nomini va sha’nini hamisha ulug‘ qo‘yadi.
Mard kishi yurtning qalqoni va xalqning suyanchig‘i bo‘ladi. O‘g‘il-qizlarini voyaga yetkazadi, ularning o‘zi yetolmagan armonlari, amalga oshmagan ishlarini ro‘yobga chiqarishini orzu qiladi.
Mardlik kishi burchida, vijdonida, qadr-qimmatida, farzand tarbiyasida, insonparvarlikda, sevgi-sadoqatda, yaxshi ishlarda namoyon bo‘ladi.
Berilgan so‘z va iboralarning ma’nosini bilib oling
Do'stlaringiz bilan baham: |
