Nókis qalalıq xalıq bilimlendiriw bólimine qaraslı

IV. Komissiyaǵa tartıslar boyınsha múrájáát etiw

Ózbekstan Respublikasınıń Miynet kodeksine muwapıq tartıslar komissiya yaki rayon (qala) sudı tárepinen kórip shıǵılıwı, óz náwbetinde xızmetker tartıstı hal etiw ushın óz qálewine bola usı organlardan birine múrájáát etiwge haqılı ekenligi atap ótilgen.

Komissiyaǵa múrájáát etiwden burın xızmetker tartıstı sheshiw boyınsha is beriwshi menen sóylesiwler ótkiziwi maqsetke muwapıq. Sóylesiwlerde hal etilmegen tartıs boyınsha arza keyininen komissiyada kórip shıǵıw ushın kiritiliwi múmkin.

Komissiyaǵa tartıstı kórip shıǵıw boyınsha arza menen tek xızmetker yaki ol wákil etken shaxs múrájáát etiwge haqılı, is beriwshiniń bunday múrájááti komissiya tárepinen kórip shıǵılmaydı.

Komissiyaǵa múrájáát etiw waqtı, jayı hám tártibi haqqındaǵı maǵlıwmatlar tanısıw ushın qolay bolǵan orında hám formada xızmetkerler itibarına jetkiziliwi kerek.

Xızmetkerdiń komissiyaǵa jollaǵan jazba arzası tiyisli dizimge alıw dápterinde jazıp alınadı. Arzalardı dizimge alıw komissiya qararı menen aǵzalardan birine (mısal ushın xatkerge) júkleniwi kerek.

Arza erkin formada jazıladı hám onda:

kárxananıń atı;

arza iyesi familiyası, atı, ákesiniń atı, jumıs ornı hám jasaw mánzili;

tartıs mazmunı, arzashı talabın tiykarlaushı halatlar, tastıyıqlawshı dáliyller;

arzaǵa qosımsha qılınǵan hújjetler dizimi;

arza sánesi kórsetiliwi hám avtorı tárepinen imzalanıwı kerek.

Arza dizimge alınǵan kún múddetlerdiń baslanıw kúni esaplanadı.

Tartıs boyınsha komissiyaǵa arza menen múrájáát etiw waqtında nızamlarda belgilangan úsh aylık múddetke qaraw kerek.

Múddetlerdiń sebepli jaǵdaylarda ótkizilip jiberilgenligi, miynet tartısları boyınsha komissiya tárepinen olardı tiklewge tiykar boladı.

Tómendegi tartıslar tikkeley rayon (qala) sudları yurisdikciyasına tiyisli bolǵanlıǵı sebepli komissiya tárepinen kórip shıǵılmaydı:

Miynet wazıypaların orınlap atırǵanda xızmetkerdiń den sawlıǵına zıyan jetkizilgeni aqıybetindegi zıyandı (sonıń ishinde, ruuxıy zıyan) yaki mal-múlkke jetkizilgen zıyandı is beriwshi tárepinen tóleniwi boyınsha tartıslar;

miynet shártnamasın biykarlaw tiykarlarınan biyǵarez, jumıs ornına tiklew haqqında, miynet shártnamasın biykarlaw waqtı hám tiykarları mazmunın ózgertiw haqqında, májbúriy progul yaki kem haqı tólenetuǵın isti orınlaǵan waqıt ushın haqı tólewge baylanıslı tartıslar;

xızmetker tárepinen is beriwshige jetkizilgen zıyannıń tóleniwi haqqında tartıslar;

tiykarsız ráwishte jumısqa qabıllawdan bas tartıw boyınsha tartıslar (Ózbekstan Respublikasi Miynet kodeksiniń 78-statyası);

is beriwshi hám xızmetkerler wákilleri menen aldınan kelisip hal etilgen máseleler boyınsha kelip shıqqan tartıslar.

Sondayaq, ayırım topardaǵı mámleketlik xızmetkerlerdiń miynet shártnamasın biykarlaw, basqa iske ótkiziw, tiykarsız ráwishte basqa iske ótkiziw yaki miynetke tiyisli múnásiybetlerdi biykarlaw menen baylanıslı jetkizilgen zıyandı óndiriw hám intizam jaza beriw máselelerine tiyisli miynet tartısları ayrıqsha nızamlarda belgilengen tártipte kórip shıǵılıp, miynet tartısları komissiyaları wákilligine tiyisli emes (Ózbekstan Respublikası Miynet kodeksiniń 276-statyası).