Navoiy innovatsiyalar instituti «tasdiqlayman» Navoiy innovatsiyalar instituti rektori

15-MAVZU: BOSHLANG‘ICH SINF O‘QITUVCHILARINING KASBIY TAYYORGARLIGINI OSHIRISH.


Reja:
1. Kasbiy tayyorgarlik yo‘nalishlari
2. Boshlang‘ich sinf metodbirlashma faoliyati
3. Boshlang‘ich sinf o‘qituvchisining darsga tayyorlanishi
4. Pedagogik faoliyati.
Tayanch tushunchalar:
Кasbiy tayyorgarlik, umumpedagogik yo‘nalish, xususiy - metodik yo‘nalish, metodbirlashma, o‘qituvchining darsga tayyorgarligi, dars konspekti
Jamiyatda ta’lim tizimi takomillashib borgan sari o‘qituvchining kasbiy tayyorgarligiga bo‘lgan talab ham ortib boradi.
Кasbiy tayyorgarlik keng tushuncha bo‘lib, u o‘qituvchining ijtimoiy, siyosiy, ma’rifiy va pedagogik tayyorgarligi kabilarni o‘z ichiga qamrab oladi. Кasbiy tayyorgarlik ikki yo‘nalishda amalga oshiriladi:
1. Umumpedagogik yo‘nalish;
2. Xususiy - metodik yo‘nalish.
Umumpedagogik yo‘nalish barcha o‘quv fanlaridan dars beradigan o‘qituvchilar uchun umumiy bo‘lib, maktabda ta’lim-tarbiya sifatini oshirish, yangi pedagogik texnologiyalarni ta’lim-tarbiya jarayoniga tadbiq etish bilan bog‘liq. Xususiy-metodik yo‘nalish bevosita «Ona tili» o‘quv fanining o‘qitilishi bilan aloqador bo‘lib, shu o‘quv fanining o‘qitilishini yaxshilash bilan aloqadordir.
Birinchi yo‘nalish pedagogika fanining qo‘lga kiritgan yutuqlarini ta’lim-tarbiya jarayonida qo‘llay olishda namoyon bo‘lsa, ikkinchisi ona tili ta’limining yangi mazmunini mukammal egallash, shu mazmunga muvofiq keladigan metod, vosita va usullarni tanlash kabilarda ko‘rinadi.
O‘qituvchi nafaqat bilim beruvchi, balki yaratuvchidir. U darsni o‘tmaydi, balki yaratadi. Shuning uchun o‘qituvchi doimiy ravishda o‘z kasbiy tayyorgarligini oshirib borishi, pedagogik hayot talablaridan ortda qolmasligi uchun hamisha o‘qishi, izlanishi, ijod qilishi lozim. Buning uchun har bir o‘qituvchi o‘z shaxsiy kutubxonasiga ega bo‘lishi, pedagogika va metodikaga oid jurnallarni o‘qib borishi, maktab va maktabdan tashqari kutubxonalar bilan doimiy aloqada bo‘lishi talab etiladi.
Ona tili o‘qituvchisining kasbiy tayyorgarligini oshirishda maktab metodbirlashmasining ahamiyati benihoya katta.