Навоий давлат кончилик институти корхона жиҳозлари

1.38. расм. Барабанли қуриткич:1–барабан; 1-бандажлар; 3–таянч роликлар; 4-узатма; 5-таянч-тиралиш роликлари; 6-кириткич; 7-парраклар; 8-вентилятор; 9-циклон; 10-чиқариб олиш камераси; 11-чиқариб олиш қурилмаси.

Нам материал барабанга юклаш камераси устида жойлашган киритгичдан 60-70° қияликда ўрнатилган лоток орқали берилади. Юклаш ва чиқариш камералари билан барабан ўртасида ҳаво сўрилишининг олдини олиш учун маҳкамлаш қурилмаси (масалан лабиринтли) ўрнатилади. Барабанга ҳаво сўрилса иссиқлик ташувчининг температураси камаяди ва тезлиги ошиб материалнинг ташиб кетилишига олиб келиши мумкин. Бундан ташқари вентилятор истеъмол қиладиган энергия сарфи ҳам кўпаяди.

Материалга иссиқлик газлардан конвекция йўли билан, ҳамда исиган насадка сирти билан барабаннинг ички сиртидан иссиқлик ўтказувчанлик усуллари билан берилади. Барабаннинг 20% атрофидаги ҳажми материал билан тўлдирилади. Барабан айланганда унинг қиялиги ва қуритувчи газларнинг таъсири туфайли материал унинг ичида маълум томонга ҳаракатланади. Газларниннг қуритгич ичидаги тезлиги 2-5 м/с бўлиши мумкин.
Қуритгичнинг барабани қалинлиги 8-20 мм бўлган пўлат цилиндр корпусдан иборат. Барабан деформацияланишининг олдини олиш мақсадида бандаж ўрнатиладиган жойда қалинлиги барабан девори қалинлигидан 1,5-2 марта катта бўлган қўшимча пайванд қилинади.
Бандажлар ускунанинг айланувчи қисмлари босимини таянч ва тиралиш роликларига узатиш учун хизмат қилади ва улар тўртбурчакли кесимга эга бўлиб, пўлатдан (одатда пўлат 40) ясалади. Роликлар эса СЧ18 ёки СЧ 21 маркали чўяндан қуйилади. Шунинг учун ясалиши осон ва арзон бўлган роликлар бандажларга нисбатан тезроқ ейилади.
Бандажлар барабанга бошмоқ (башмак) билан маҳкамланади. Бошмоқнинг ўзи эса барабан деворига маҳкамланган қўшимчага пайвандлаб ёки болтлар ёрдамида уланади. Бандажнинг барабан ўқи бўйлаб силжишининг олдини олиш учун бошмоқнинг бўртиқ жойлари турли томонга қаратилган бўлади. Бошмоқ билан бандаж ўрасидаги оралиқ таглик (подкладка) ёрдамида созланади.
Барабанли қуритгичларнинг таянч-тиралиш станцияси асосий плитадан ва унга маҳкамланган таянч роликларининг тўртта подшипник қисми, ҳамда вертикалга нисбатан озроқ қияликда жойлаштирилган тиралиш роликларидан иборат.