Мундарижа кириш

IV. Синов саволлари.
1. 1000 В кучланишгача бўлган элктр ускуналарда ерга улагич қаршилигининг рухсат этилган чегаравий қиймати.
2. Кучланиши 1000 В дан юқори бўлган электр ускуналарда ерга улагич қаршилигининг рухсат этилган чегаравий қиймати.
3. Электр узатиш тармоғида ерга улагичлар қандай ўрнатилади?
4. ТП - 6-10 кВ, ОТҚ (ОРУ) – 6-10 кВ трансформатор подстанциялари ва тақсимлаш қурилмалари ерга улагичи қандай ўрнатилади?
5. 220 кВ ва ундан юқори кучланишли ОТҚ (ОРУ) ва электр узатиш тармоғида ерга улагичининг тузилиши.


10-маъруза. Электр моторлар. Коммутацион аппаратлар ва комплект тақсимловчи ускунллар. Ток трансформаторлари.

Режа:	I.	Электр моторлари.
	II.	Коммутацион аппаратлар ва комплект тақсимловчи ускуналар.
	III.	Ток трансформаторлари.
	IV.	Синов саволлари.

I. Электр моторлар.
Электр моторлар ва унинг ҳаракатга келтирувчи механизмларининг ток ўтказувчи ва айланаётган қисмларига тегиш билан боғлиқ бўлган ишлар олиб борилганда, электр мотордан кучланиш олиб ташланиши шарт.
Электр моторларни ток ўтказувчи қисмлари ва унинг ҳаракатга келтирувчи механизмларига ва айланаётган қисмларига тегиб ишлаш керак бўлмаган барча ишларни мотор ишлаб турган пайтида бажариш мумкин.
Электр моторда иш олиб борилганда ерга улагични электр моторни тақсимловчи ускуна (шчит) билан боғловчи кабел электр тармоғининг исталган қисмига қўйиш мумкин. Механизмларнинг айланаётган қисмига тегиш даркор бўлмаган ишларни бажаришда ва уловчи муфтани бўшатиб ажратиш керак бўлган тақдирда кабел электр тармоғини ерга улаш талаб қилинмайди.
Агар ўчирилган электр мотордаги ишлар бажарилмаётган ёки бир неча кунга тўхтатилган бўлса, электр моторни электр тармоғи билан улайдиган кабел электр тармоғи электр мотор томонидан ерга улаб қўйилиши шарт. Кабелнинг кўндаланг кесими кўчма ерга улаш ускунасини қўллашга имкон бермаса, 1000 В кучланишгача бўлган электр моторларда кабелнинг фазалари пайининг кўндаланг кесимидан кам бўлмаган мис сим билан ёки кабелни фазалари пайларини ўзаро бир-бирига улаб уларни изоляциялаш керак. Ушбу ерга улаш ёки кабел фазаси пайларини бир-бирига улаш тезкор-диспетчерлик журналида кўчма ерга улагичлар сингари ҳисобга олиниши шарт.
Насослар, тутун мўрилари ва ҳаво юборувчи ускуналар электр моторларида, агар ушбу ускуналарга уланган механизмлар орқали электр моторни айланиб кетиши мумкин бўлса, электр моторларда ишлашга ижозат беришдан олдин уларнинг задвижка ва шиберлари ёпилиши ва қулфланиши, шунингдек электр мотор роторларини тормозлаш чоралари кўрилиши шарт.
Иш олиб борилаётган электр мотор яқинида жойлашган бир хил турдаги ёки унга ўхшаш габаритли электр моторларга, ишлаб туришидан ёки захирада турганидан қатъий назар «Тўхта! Кучланиш!» деган шиорлар осилиши шарт.
Электр моторлар ишлаб турган пайтида айланаётган қисмларига қўйилган тўсиқларни олиш ман қилинади.
Юритмаси қўлдан бошқариладиган юргизиш аппаратлари билан жиҳозланган электр моторларни улаш ёки (ёқиш) ва ўчириш диэлектрик қўлқопда бажарилиши зарур.
Бошқарув механизмларининг электр юритмалари шибер, задвижка ва бошқа қурилмалар билан уланган бўлса, задвижкаларнинг электр юритмасини ишлаш-ишламаслигини текшириш, ўша ускуна ўрнатилган технологик цехнинг смена бошлиғи рухсати билан махсус бригада амалга ошириши шарт.
Рухсатнома берилганлиги тўғрисида технологик цехнинг тезкорлик-журналига, бу рухсатни олганлиги ҳақида эса ишлаш-ишламаслигини текширувчи цехнинг (бўлимнинг) тезкорлик журналига ёзиб қўйилади.
Бошқарувчи механизмлар, тартибга солувчи органлари ва очиб-ёпувчи аппаратларга уланмаган электроприводларни, электр юритмалар-нинг электр чизмаларини таъмирлаш ва созлаш фармойиш билан бажарилиши мумкин. Уларни ишлаш-ишламаслигини текширишга фармойиш берган ходим рухсат беради. Бу тўғридаги ёзувни фармойиш рўйхатга олинаётганда ёзилади.
Иш батамом битирилгунга қадар электр моторни ишлаш-ишлабмаслигини текшириш учун, уни электр тармоғига улаш тартиби қуйидагича:
- иш наряд бўйича бажарилаётган бўлса, ишбоши наряднинг 3-жадвалида иш тамом бўлганлигини расмийлаштириб, нарядни топширади;
- иш фармойиш бўйича бажарилаётган бўлса, иш тўхтатилиши ва бригада иш жойидан чиқарилиши шарт;
Ишлаш ишламаслиги текширилгандан сўнг наряднинг 3-жадвали расмийлаштирилиб, бригада қайта ишлашга ижозат берилади.
Иш фармойиш бўйича бажарилаётган бўлса, бригадага қайта ишлашга ижозат бериш учун янги фармойиш берилади.