Nazorat savollari:
1. Antibiotiklar nima? Ular bakteriyalarga qanday ta'sir qiladi?
2. Antibiotiklarning ta'sir birligi deb nimaga aytiladi?
3. Agarga diffuzlash usulini ta'riflang.
4. Bakteriyalaming antibiotiklarga sezuvchanligini aniqlashning usullarini ayting.
5. Suyuq yoki zich oziq muhitlarda antibiotiklarni bir qator suyultirish usuli.
13-mavzu: Atrof-muhit obyektlarini mikrobiologik tekshirish
usullari
Mashg’ulotning maqsadi: Talabalarni atrof-muhit obyektlari holatini sanitar - mikrobiologik baholashning asosiy usullari va ko’rsat-kichlari bilan tanishtirish.
Material va jihozlar: Koloniya sanash uchun asbob, kolbalarda suv, tuproq, sut namunalari, go’sht va go’sht mahsulotlari namunalari; steril Petri kosachalari, Petri kosachalarida GPA, qonli GPA, 9 ml steril suvi bor probirkalar, 10, 2, 0,1 ml hajmli pipetkalar, probirkalarda 10-12 ml dan steril GPA, o’lchangan tuproq, kolbada steril suv (200 ml), probirkalarda Keyssler, Vilson - Bler muhitlari, buyum oynalar, bakteriologik ilmoq, spirt lampasi, bo’yoqlar to’plami, mikroskop, ichak tayoqchasi kulturasi mavzuga oid plakatlar.
Uslubiy ko’rsatmalar.
O’qituvchi darsni tushuntirib, talabalarga vazifa beradi: Suvdagi mikroblarning umumiy sonini, suvning koli-titri va koli-indeksini aniqlash, havo, tuproq mikroflorasini tekshirish usullarini o’rganish, daftarga yozib olish.
Epizootik xavfsizlikni aniqlash maqsadida atrof-muhitning har xil obyektlarini sanitar - gigiyenik holati baholanadi va sanitar-bakteriologik tekshirishlar o’tkaziladi. Ularni to’g’ridan-to’g’ri aniqlash qiyin, chunki bu mikroorganizmlar miqdori suv, tuproqda kam bo’lib sekin ko’payadi. Shuning uchun sanitariya-mikrobiologiya amaliyotida ma'lum obyektning mikrob bilan zararlanishini aniqlash va unda sanitariya ko’rsatkichli bakteriyalarni topish usuli qo’llaniladi.
Mikrob bilan zararlanish tekshirilayotgan obyektning ma'lum hajm va massa birligidagi (1 sm3 suv, 1 g tuproq, 1 m3 havo) mikroorganizmlarning umumiy miqdori, ya'ni mikroblar soni bilan ifodalanadi.
Ulardagi sanitariya ko’rsatkichli bakteriyalar titr va indekslarda baholanadi. Ushbu bakteriyalar topilgan minimal hajm yoki massa titr deb aytiladi. 1 litr suyuqlik, 1kg tuproq, 1 m3 havodagi sanitariya ko’rsatkichli bakteriyalar soniga indeks deb ataladi.
Sanitariya ko’rsatkichi hisoblangan ichak tayoqchalari guruhi bakteriyalari enterobakteriya oilasining turli avlodlariga mansub.
Do'stlaringiz bilan baham: |