Microsoft Word Bolalar nevrologiyasi end doc

Orqa markaziy pushta o‘smasi. 
Umumiy sezuvchanlik po‘stloq analizatorining 
ta’sirlanish va tushib qolish simptomlari bilan xarakterlanadi. Ular avvaliga 
Djeksonning sezuvchi paroksizmlaridan boshlanib, lokal sensitiv buzilishlar 
ko‘rinishida kechadi (turli xil paresteziyalar). Tushib qolish belgilari 
monoanesteziya, sensitiv astereognoziya, qo‘l barmoqlarida atetoid harakat 
(psevdoatetoz)lar paydo bo‘lishi bilan kechadi.
Tepa bo‘lagi o‘smalari. 
Bunda o‘smadan qarama-qarshi tarafda sezgi buzilishlari 
– gemianesteziya, autotopognoziya, sezgining murakkab turlarini buzilishi 
(ayniqsa stereognoz) paydo bo‘ladi. Agar o‘sma chap pastki tepa bo‘lagida 
joylashsa o‘naqaylarda ikkala qo‘lni apraksiyasi, aleksiya, amnestik va semantik 
afaziya, akalkuliya kelib chiqadi.
Chakka bo‘lagi o‘smasi. 
Bu o‘smalar ta’m, hid bilish, eshituv va ko‘ruv 
galyutsinatsiyalari yoki generallashgan epixurujlardan oldin shunday auralar bilan 
kechadi. Ba’zan xushning o‘ziga xos bo‘lgan holati–“oldin ko‘rgandek” yoki 
“umuman ko‘rmagandek” holat ko‘rinishida rivojlanadi. Bundan tashqari, eshituv 
agnoziyasi, gomonim kvadrant gemianopsiya, hidlarni ajrata olish qobiliyatining 
buzilishi kuzatiladi. O‘naqaylarda chap chakka bo‘lagi o‘smalarida sensor afaziya 
paydo bo‘ladi. Ularni o‘ng chakka bo‘lagi “soqov” soha deyiladi.
Ensa bo‘lagi o‘smasi. 
Ko‘ruv analizatorini po‘stloq qismining buzilishi gomonim 
gemianopsiya ko‘rinishida markaziy ko‘ruv maydonini saqlanishi bilan kechadi, 
lekin buni bemor sezmaydi. Bundan tashqari, fotopsiya, metamorfopsiya, ko‘ruv 
gallyutsinatsiyalari, rang ajratishning buzilishi kuzatiladi. 17-maydonning 2 
tomonlama zararlanishida po‘stloq ko‘rligi paydo bo‘lib, qorachiqning yorug‘likka 
reaksiyasi saqlanadi, 18-va 19-maydonlarning 2 tomonlama zararlanishi ko‘ruv 
agnoziyasi bilan kechadi. Ba’zan Burdenko-Kramerning tentorial sindromi 
rivojlanadi (ko‘z olmasiga, qosh ustiga uzatiluvchi og‘riq, yorug‘likdan qo‘rqish; 
ko‘zni yoshlanishi).